BARANGAY konsehal nga gikatahapang bigtime financier sa illegal swertres nadakpan sa buy bust operation uban sa unom ka mga sakop niadtong Dominggo sa alas 8:30 sa gabii sa Sitio Avocado, Barangay Mambaling, dakbayan sa Sugbo.

Si Rogelio Vestil Atillo, 68, biyudo, konsehal sa Barangay Mambaling gipu­sasan uban sa iyang mga sakop nga giilang sila si Ronnie Atillo, 53; Lucino Atillo, 58, igsuon sa konsehal; Renato Rosal, 55; Jenny Atillo, 47; Regina Castro, 32; Carmel Salado 18; ug Criselda Pepito 18.

Si Supt. Romeo San­tander, hepe sa City Intelligence Branch (CIB) sa Cebu City Police Office (CCPO) nga nahinabi sa Sun.Star Superbalita, nagkanayon nga dugay na nilang gi-monitor si Atillo.

Naglisod sila sa pagsulod sa nahimutangan niini sanglit dunay upat ka mga close circuit television (CCTV) camera sa balay niini hinungdan nga ma-monitor ang kalihukan sa gawas.

Human sa ilang gihan-ay nga lakang, gipahigayon nila ang buy bust operation pinaagi sa pagpatad sa swertres dayon gisulod nila ang balay.

Ilang naaktuhan ang usa ka sakop niini nga ni-remit sa kita sa sugal ingon man ang laing unom ka mga sakop nga nagtali sa mga illegal numbers.

Gipusasan nila lakip si konsehal Atillo, kinsa didto sa dapit.

Ilang nasakmit ang dag­­­hang gambling para­pher­nalia, calculators, mga stabs, TV, telepono, dag­­hang fax machines, h­a­lin nga dul-an sa P10,000 ug uban pa.

Si Santander niingon nga si Atillo nalakip na sa ilang target list/watch list sa dugay nang panahon kay bisan sa wa pa ma-opisyal, nagpadagan kini sa illegal nga sugal.

Ang operasyon ni Atillo di lang dinhi sa dakbayan sa Sugbo, lakip sa ubang dapit sa Sugbo.

“Mitago sila. Natingala mi kay namingaw sa sulod. Among gisiksik ang lugar, naa diay sila sa ‘secret room’ nga way suga, nagtapok silang tanan. Nagpaila siyang konsehal, among gipusasan,’ dugang ni Santander.

Iyang gihulagway si Atillo nga bigtime financier sa sugal mokitag kapin sa P1 milion matag semana, samtang ang kita sa usa ka adlaw kapin sa P300,000.

Ang mga silingan nag “people power” batok sa mga pulis, gilabanan nila ang konsehal ug gikwestyon ang ilang pagdakop.

Matod ni Santander nga wa nigamit og pwersa ang mga silingan pero gipangsinggitan silang mga pulis, ingon man nagbugal-bugal.

Siya niingon nga si Atillo “Robin hood” sa i­­lang lugar kay daghan og gitabangan ug maayong tawo kini.

Si Santander niingon nga kasong kalapasan sa Republic Act (RA) 9287 ang ilang gi-andam nga ipasaka batok kang konsehal, Atillo ingon man sa mga kauban.

Si Atillo nga nahinabi sa Sun.Star Superba­lita mi-aligar nga pulitika maoy nagpaluyo sa iyang pagkasikop tungod kay dunay nahadlok sa iyang tinguha nga magpapali isip kapitan sa sunod eleksyon.

Wa siya mohatag og detalye kon si kinsa kini apan usa sa iyang kauban sa konseho maoy iyang gituohang nagpadakop kaniya.