NAINSULTO si Presidente Benigno Aquino III sa pasangil nga gamiton sa Liberal Party ang P14.4 bilyones nga gibayad sa GMR-Megawide Cebu Airport Corp. isip premium sa nasudnong kagamhanan, alang sa ilang kampanya sa umaabot nga piniliay sunod tuig.

Bisan si Department of Interior and Local Government Secretary Mar Roxas, ang gidungog nga maoy pambato sa administration party sa 2016 presidential elections, nagkanayon nga limpyo ang ilang konsensya ug wala nila pahimusli ang salapi sa katawhan.

Kini ang reaksyon sa duha ka mga opisyal human si kanhi gobernador Emilio “Lito” Osmeña nanghinaut nga dili gamiton sa LP ang pundo alang sa pagpalambo sa Mactan Cebu International Airport.

“Alam ho n’yo, talagang nakakainsulto iyon dahil, unang-una, meron ba tayong kilalang magnanakaw na sasabihin niya kung ano ang nanakawin niya bago niya nakawin?...Magnanakaw na raw ho ‘yung partido namin, tanga pa. Sobra namang insulto ho yata talaga ‘yun. Pero ganoon talaga ang buhay, lulunukin ko na lang ho,” namahayag si Aquino sa iyang pakigpulong human sa seremonya sa groundbreaking sa P17.5 bilyones nga konstruksyon sa passenger terminal 2 building sa MCIA kagahapon sa hapon.

Ang presidente, ang nangulo sa seremonya uban sila si Roxas, Tourism Secretary Ramon Jimenez Jr., DOTC Undersecretary Jojo Lotilla ug mga opisyal sa GMCAC ug mga opisyal sa Sugbo.

Wa mobutyag si Aquino kon kinsa ang nitug-an kaniya bahin sa pamahayag ni Osmeña. Apan siya niasoy nga nagdungan sila og paniudto ni Cebu Gov. Hilario Davide III sa wala pa ang kalihokan sa MCIA.

Sa usa ka press conference, si Osmeña nipadayag sa iyang panghinaut nga maayo unta ang mga Sugbuanon ug ang mga tiggamitan sa airport ang tinuoray nga makabenepisyo sa P14.4 bilyones ug dili ang Liberal Party isip campaign funds.

Matod ni Aquino nga mas maayo basahon ni Osmeña ang kontrata tali sa GMCAC ug Department of Transportation and Communication ug MCIA Authority bahin sa pagpalambo sa tugpahanan ug pagdumala niini sud sa 25 ka tuig.

Ang presidente nipasabot nga ang kwarta modiretso sa nasudnong panudlanan diin matod niya ang Kongreso ang adunay katungod nga magsulti kon asa dad-on ang pondo.

“O itong nagsalitang ito na binalita sa akin, wala kang kausap, kakausapin ko po si Secretary Dingky Soliman (DSWD) na tulungan ka ng social welfare, at ihanap ka ng kausap,” dugang ni Aquino.

Si Roxas sa buwag nga pakighinabi sa mga tigbalita human sa pakigpulong sa presidente, niingon nga gitahod niya si Osmeña apan sayop ang mga kasayoran niini.

“Hindi lang malinis ang aming konsensya, malinis ang aming trabaho. Hindi kami magnanakaw, hindi natin nilalapastangan ang pera ng tao, kitang kita at transparent lahat itong mga gawain sa ilalim ng administrasyon ni Pangulong Aquino,” pagpasabot sa kalihim sa DILG.

Sa wala pa mamulong si Aquino, nangulo una siya sa groundbreaking ceremony dayon gisuroy ug gipakita siya sa mga opisyal sa GMCAC sa gihimo nga kalamboan sa tugpahanan human gitugyan ngadto sa private consortium ang pagpalambo niini sa niaging tuig.

Ang presidente nidugang nga ang kalamboan sa MCIA maghatag og inclusive growth, dili lang sa pipila ka mga tawo kondili sa kinatibuk-an, tungod kay magdala kini og daghang mga turista sa Sugbo ug tibuok nasod.

Si Davide sa iyang pakigpulong, nagkanayon nga ang airport maoy unang makita nga impression sa Sugbo ug gipasalamatan ang presidente sa mga proyekto ug programa nga naghatag og kalamboan sa Sugbo.

Si Louie Ferrer, presidente sa GMCAC, namahayag nga sa higayon matapos na ang unang hugna sa bag-ong terminal, moabot na unya sa 12.5 milyones ka mga pasahero kada tuig ang maserbisyo-an sa airport gikan sa 4.5 milyones ka mga pasahero karon.