NAKADAWAT ko og daghan kaayong mensahe labot niadtong report nako sa TV Patrol Central Visayas nga naghisgot kang Bogart ang tigre sa Cebu City Zoo. Busa gituyo nako pagsuroy ang zoo kay ang dagan sa report mahitungod man sapag-ila sa tuig 2010 isip year of the tiger.
Human ko makapangayo og clearance gikan ni Giovanni Romarate, manager sa zoo, nakasugod sab ko pag-interview sa mga tawo nga nahimuot kaayong nnagsud-ong kang Bogart.
Usa sa akong na-interview mao si Lani Igot usa ka maestra sa Quezon City. Gihulagway ni mam Lani ang iyang kaugalingon nga sama sa tigre, nga di makamaong mahadlok, agresibo, ug labaw sa tanan buotan sab. Natawo diay siya niadtong 1986 nga naatol nga year of the tiger. Ang lain nako gi-interview nga si Tita Igot maoy nakapahimuot og maay sa mga naka kita sa akong report.
Matod ni Mrs. Igot nga kong isog ang mananap nga tigre mas isog pa ang tigre nga naa kanu-nay sa balay. Ang iyang gi-pasabot ang mga asawa, nga wa gyu’y kaluyang mamugno sa mga nagniyabag nga bana.
TINIGRE
Kataw-anan apan dakong tinuod ang gitubag ni Mrs. Igot kanako labot sa mga asawa nga usahay mag tinigre sab. Di sayon ang papel sa mga asawa. Sila pa’y magdala sa budget sa balay, momata og sayo kay mag-andam sa balon ni Mister. Manglaba, magkaligo sa mga bata sa di pa pakan-on ug ihatod sa eskwelahan. Unya diay mga yabag nga bana nga usahay makalimot og pauli tungod sa kahubog.
Ang uban lain pa gyud nga balay ang uli-an. Kinsay di mag-tinigre ana. Busa kining tuiga di lang ni year of the tiger, tuig sab ni sa mga tigre diha sa balay. Mga mi-sis
ayaw padaug kumbati gyud!
PASALAMAT
Ang akong 2009 natapos pinaagi sa usa ka serbisyo publiko.
Nahitabo ni niadtong Miyerkules sa hapon. Natayming nga didto ko sa may United Nations Avenue manaug gikan nga nag-sakay patrol car sa news team ni Edgar Escalante.
Naagian nako kini si Johnwell Patatag nga gitapok-an sa mga tawo. Gipaak diay siya og iro. Unya kay igo ra mang ginusnusan og ahos ang mga pinaakan mao nga ako siya nga gidala sa Mandaue City District Hospital.
Pasalamat ko nila ni Randy Reyes, Cesar Ylanan ug Eugene Cbatingan, pulos mga empleyad sa TEAM nga nipasakay nako sa ilang service vehicle.
Didto sab sa district hospital magpasalamat sab ko kang Dr. Oscar Quirante nga mao chief og hospital karon, tungod sa ilang daling pag-atiman sa bata.
Gikan sa hospital milahos mi sa City Health Office, ug didto natuplokan gyud si Johnwell og tambal sa rabbies. Gusto nakong pasalamatan si Madam Jam Seno, Cheryl Bernaldez og ang staff sa animal bite section tungod sa ilang dinaliang action. Ang sitwasyon man hud ingon ini.
Si Johnwell gipaak udto pa mao nga puwerti na niyang hilanata pagkita namo. Pun-an pa kay wa sab ang iyang inahan og amahan, nga giingong nanginabuhi pa lisod nga di siya maatiman dayon ug madapatan og tambal.