KAY pak-an man ang panaad, dayag nga kini layo’g lupad. Bitaw, sutoy ug laktod gyod sa panganod ang pangandoy.
Apan gikan pagtugpo sa panumpa alang sa kaugalingon atol sa bag-ong tuig—“New Year’s resolution,” sa Iningles pa—kini kasagaran wa’y kalainan sa mga tulilik nga tabanog. Aguroy, maugbok dayon! Nan, nagpasabot ba kini nga kawang lang ug dili na ta angay mousab sa pagkapakapa paingon sa kanawkanaw sa atong tingusbawan?
Sigon sa ulahing wali ni Cardinal Vidal, kinahanglang’ takos ta pagsanog sa tahas aron matuman ang kalinaw alang sa kaugalingon ug sa tibuok kalibotan. Niining paagiha ra nato maangkon ang kausaban ug kauswagan. Pastilan, di lalim! Di tiaw nga tugbang kini sa bulohaton sa Manunubos. Kay sumala pa sa giawhag ni Santo Papa, “If you want to cultivate peace, protect creation,” said Pope Benedict XVI. Kon buot tang magtikad og kalinaw, kinahanglang panalipdan nato ang tanang binuhat.
Yamat ra, duna kaha ta’y igong gahom aron sarang ta ug wa’y kutas nga motupong niining sa tuyhakaw nga tahas! Duna kaha ta’y igong kusog ug katakos sa pag-ambit ug mobulig ning langitnon nga bulohaton sa pag-atiman sa atong kalikopan?
“Ah, but a man’s reach should exceed his grasp, or what’s a heaven for?” Matod pa sa magbabalak nga si Robert Browning, alang sa unsa pa kuno ang langit kon dili labaw sa atong kupot ang buot natong makab-ot sa hingpit?
“Hulog ng langit” kuno ang gipadayag sa Cardinal, kon si Atty. Gloria Estenzo-Ramos sa Global Legal Action for Climate Change (GLACC) ang pangutan-on. Kay dako kuno’g ikatabang ang simbahan aron maikag ang katawhan sa pagmatngon ug pagkugi og abag alang sa kapiskay sa atong pinuy-anang kalibotan. Dinhi diin ang kundat nga panamastmas sa kalikopan nagsamin sa katilingbanong pagkagusbat.
Dayag nga kining law-ay nga kamatuoran usa ka timailhan sa sa kanihit sa kaangayan samtang gapatuyang ang mga gamhanan—ang mga gagmayng ginoo—sa ilang kahakog.
Tan-awon ta, matod pa sa GLACC, kon ang panawagan sa simbahan mobagting ba pod kaha sa dunggan sa kagamhanan. Samtang gakara-kara ang gahupot og katungdanan sa pagpangandam sa piniliay karong tuiga, maayo unta kon kitang mga botante igmat ug kusganon nga moaghat sa mga politiko sa pagtuman sa ilang pasiatab nga sila mao’y sulugoon sa katawhan alang sa kaugmaran sa tanan?
Nan, nindot kon kitang mga botante tupong unta sa tahas sa pagmatngon ug paghashas sa mga kandidato aron dili lang nato masuta kon kinsa’y lupad sa ilang panaad apan kon kinsa’y matinud-anon ug tugkad ang tiil sa yuta. (geemyko@gmail.com)