Barrita: Senior citizens

GIPIRMAHAN na ni Pres.Gloria Macapagal-Arroyo ang Republic Act 9994, ang Expanded Senior Citizens Act (Esca) of 2010, nga maghatag og dugang mga benepisyo sa mokabat sa lima ka milyon nga mga senior citizens sa tibuok nasod.

Ang mga senior citizens mao kadtong nagpanuigon og gikan sa 60 anyos pataas.

Mao kini ang dugang mga benepisyo sa mga senior citizens ubos ning maong balaod:

Diskwento nga 20 porsento ug exemption sa 12 porsento nga value-added tax (VAT) sa pagpalit ug mga butang ug bayad sa mga serbisyo lakip na sa tambal, medical ug dental fees, pletehan, serbisyo sa mga hotel ug mga restaurant, sinehan ug ubang lugar sa kalingawan.

Kon ugaling dunay mga discount promotion, ang mga senior citizen magpili kon unsay ilang pahimuslan ug hain maoy mas dako sa promotional discount ug sa 20 porsento nga discount.

Mandatory coverage sa PhilHealth. Libreng serbisyo medical ug dental, diagnostic ug laboratory fees sa tanang facilities sa kagamhanan.

Allowance nga P500 matag buwan. Kon ang senior citizen indigent o kabus, P1,500 ang iyang binuwang allowance ug libre pa gyud ang iyang bakuna sa influenza virus ug pneumococcal disease.

Singko porsento nga diskwento sa bayranan sa tubig kon ang konsumo kubos sa 30 cubic meters matag buwan ug sa bayranan sa kuryente kon ang konsumo kubos sa 100 kilowatt-hours matag buwan.

Hatagan usab og education assistance kadtong mga senior citizens nga kwalipikado sa pagtungha.

Kining maong mga benepisyo makuha sa usa ka senior citizen pinaagi sa pagpresentar sa iyang pasaporte ug ubang mga dokumento nga magpakita nga siya usa ka Pilipino ug sa iyang edad.

Kon mamatay ang usa ka senior citizen, ang iyang labing duol nga paryente makakuha og P2,000.

Dunay silot niadtong mosupak ning maong balaod. Sa unang paglapas, unom ka buwan ngadto sa duha ka tuig nga pagkabilanggo ug multa gikan sa P50,000 ngadto sa P100,000. Sa ikaduhang paglapas, multa hangtod sa P200,000 ug pagkabilanggo hangtod sa unom ka tuig.

Kadtong mag-abusar sa mga prebiliyo ubos ning maong balaod multahan og gikan sa P5,000 ngadto sa P50,000 ug pagkabilanggo sa labing menos unom ka buwan.

(Ang atong paghisgut-hisgot mahitungod sa balaud madungog na matag karon ug unya sa mga tampo nga dunay punto legal ngadto sa tulomanon nga “Alang Kanimo Kapuso” nga gisibya gikan sa ala-una ngadto sa alas dos sa hapon sa sibyaan DYSS Superadyo sa RGMA network.)

(Sa mga reaksyon kang Atty. Eddie O. Barrita: E-mail: edbarrita@yahoo.com; Cell # 09165805285; Room 201, 18 Cherry Court Bldg., Gen. Maxilom Ave., Cebu City)

r

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph