MOSOBRA sa duha ka adlaw nga nagpa-utaw-utaw sa kadagatan sa Tañon Strait ang tulo ka mga molupyo sa lungsod sa San Remegio, Sugbo dihang nadaut ang makina sa pumpboat nga ilang gisakyan human naghatod sila sa ilang paryente ngadto sa isla sa Bantayan niadtong bisperas sa Bag-ong Tuig.

Tubig lang sa uwan maoy gitambal sa kagutom nilang Cristituto Monsidor, 45; Winlove Derder, 26; Reximon Tapay, 22; mga molupyo sa Barangay Hagnaya, San Remegio samtang gianod ang ilang pumpboat sa bul-og sa dagat sugod niadtong Disyembre 31 sa alas 9:30 sa gabii gikan sila sa pantalan sa lungsod sa Sta. Fe sakop sa Bantayan Island hangtod nga nabangalan silag usa ka mananagat sa Barangay Japitan, Barili kagahapon sa alas 6:30 sa buntag.

For updates from around the country, follow Sun.Star on Twitter

May dala unta nilag cellphone si Tapay apan way kini gamit kay low bat busa wa sila makakontak sa ilang mga kabanay kon unsay ilang nadangatan human nadaut ang makina sa ilang pumpboat.

Si Edgardo Santillan, igsuon sa nanag-iya sa pumpboat nga si Janice Tutor, nisaysay sa Sun.Star Superbalita kagahapon nga silang Monsidor ug kaubanan nihatod sa ilang uyoan nga si Raymundo Santa Teresa ngadto sa Sta. Fe nianang alas otso pasado sa gabii sa Disyembre 31, 2009.

Matod ni Santillan nga alas 9:10 sa gabii naabot silang Monsidor ngadto sa pantalan sa Sta. Fe unya nibiya gilayon sila paingon sa Hagnaya mga alas 9:30 apan wa na sila makabalik ug kagahapon na sila nagkakita didto sa pantalan sa Barangay Japitan, Barili human nabangalan sila ni Dodong Cancio nga nanagat niadtong higayona sa kadagatan sa Barili.

Iyang gisaysay nga ang asete sa makina sa pumpboat nga gidala nilang Monsidor nag-agas busa gituyo nila sa pag-patay ang makina niini hinungdan nagpa-utaw-utaw sila sa kadagatan ug wa na sila mahibalik ngadto sa Hagnaya.

Dihang wa sila mahi-balik, nianang Enero 1 gipapangita gilayon sila sa mga kabanay nilang Tutor ginamit ang laing mga pumpboat diin nangabot silag kaislahan sa Sugbo ug Negros apan pakyas sila sa pagkita nilang Monsidor.

Apan, kagahapon sa buntag samtang nanglumyagan si Cancio sa kadagatan sa Japitan nabalangan sila niini human nangayo silag panabang nga ma-rescue.

Ang tulo gidala gilayon ngadto sa pantalan ug gitabang sila sa ubang mga molupyo sa Japitan unya gipa-charge gilayon nila ang ilang cellphone ngadto sa ilang Emelia Ricaplaza dayon gihatag nila ang tulo ka numero aron makontak gilayon ilang mga kabanay nga nabangalan sila. Ilang natawgan ang usa sa tulo ka mga numero ug napahibawo nila ang kahimtang nilang Monsidor ug kaubanan.

Nisaysay si Ricaplaza nga nagkurog ug nagbaragbarag ang tulo dihang nihaw-an sila gikan sa ilang gisakyang pumpboat unya iyang gipapainit kinig kape nga gisagolag gatas ug pan. (JECT)