SA tinguhang masalbar ang labing dako ug labing giatngang away ning panahuna, maghugpong ugmang adlawa (RP time) ang mga representante nila ni pound-for-pound champion Manny Pacquiao ug Floyd Mayweather Jr..

Ang panaghugpong ipahigayon sa opisina ni retired federal judge Daniel Weinstein sa Santa Monica, California.

For updates from around the country, follow Sun.Star on Twitter

Si Weinstein gitahasan nga maoy magpatunga sa negusasyon sa tinguhang madayon gyud ang away nga giplanuhang ipahigayon karong Marso 13.

Dili na bag-o alang kang Weinstein kining maong sitwasyon. Malampuson niyang nasulbad ang panagbangi kanhi sa Top Rank Promotions ni Bob Arum ug Golden Boy Promotions ni Oscar De La Hoya kabahin sa inilugay sa katungod sa pagdumala kang Pacquiao.

Si Arum, kinsa maoy morepresentar ni Pacquiao sa panagtigom kauban si Top Rank president Todd DuBoef, nagkanayon kagahapon nga ang bugtong paagi nga madayon ang away mao ang pagtangtang sa sugyot sa kampo ni Mayweather nga random blood testing.

Unya kinahanglan sab mangayo sila’g public apology kabahin sa ilang pasangil nga nagamitan og Performance-Enhancing Drugs (PEDs) si Pacquiao.

“Absolutely, from every single one of them. Everybody,” matod ni Arum sa interbyu sa USA Today kabahin sa kon kinsa ang angayang mangayo’g pasaylo.

Ang kampo ni Pacquiao nipasaka na’g kaso batok sa mga Mayweather ug sa GBP.

Nagkanayon si Arum nga dili siya makahatag og komentaryo kon lakip ba sa husayon ugma ang kasong gipasaka ni Pacquiao.

Ang abogado ni Pacquiao nga si Daniel Petrocelli motunga sab sa pagatigom.

Ang kampo ni Mayweather nipadayag nang daan nga padayon pa silang naghandom nga masalbar gyud ang away.

Kon dili gyud madayon, ang kampo ni Pacquiao nagpunterya nila ni Yuri Foreman o Juan Manuel Marquez isip maoy kontrahon samtang ang kampo ni Mayweather magtinguha kang Matthew Hatton.