SUGOD NA? Wa pa gani magsugod ang kampanya sa piliay karon Mayo, nagsugod na og tinudloay ug basulay ang mga kandidato sa dakbayan sa Lapu-Lapu. Unsa na kaha kon magsugod na ang kampanya?
Gitumbok ni Kon. Junard “Ahong” Chan ang pundok ni Mayor Boy Radaza sa kamatayon ni Allan Berame, nga gipusil niadtong hapon sa Huwebes, Disyembre 31. Matud pa ni Chan iyang lider sa Barangay Calawisan si Berame.
Apan gipanghimakak ni Mayor Boy Radaza ang mga pasangil ni Konsehal Chan, nga kandidato pagka mayor sa Nationalist Peoples Coalition (NPC) sa dakbayan sa Lapu-Lapu batok ni Paz, ang asawa ni Mayor Radaza.
Tinuod man o dili nga dunay kalabutan ang pundok ni Mayor Radaza sa pagpatay-pusil kang Berame angayan unta nga ilang huwaton ang resulta sa imbestigasyon nga gipadangat sa pulis.
Si Mariano Natuel, ang hepe sa cuerpo sa pulis sa dakbayan sa Lapu-Lapu, nagkapuliki og panagang sa pasangil ni Chan batok sa pundok ni Mayor Radaza. Matud pa ni Natuel way labut ang pulitika sa maong patay.
Ang pagduda ni Konsehal Chan nga dunay kalabutan ang pulitika sa pagpusil-patay kang Berame nakahatag og di maayong impresyon sa kapulisan sa dakbayan.
Sa minubong pung way pagsalig si Konsehal Chan sa kapulisan.
Apan giunhan ni Mayor Radaza si Konsehal Chan nga kining iyang mga pasangil batok sa ilang pundok iya lang kini nga imahinasyon aron masulod sa Comelec control unya ang piliay sa dakbayan.
Sa laing bahin, daghan ang dili makatuo sa sitwasyon karon nila ni Mayor Radaza ug ni Konsehal Chan. Si Radaza ug Chan kauban kaniadto sa usa ka partido. Gani, matud pas mga taho, nga si Chan responsable sa unang pagdaug ni Radaza pagka mayor.
Sa akong tan-aw, ang hinungdan sa pagbuwag nila ni Chan ug Radaza sa pulitika morag mayagyag unya inig sugod sa kampanya.
Daghan ang nag-ingon nga dunay daghang nahibaw-an si Chan batok ni Radaza. Tungod sa kamatayon ni Berame si Chan mangayog gwardiya gikan sa Comelec sa panahon sa kampanya. Kini nagpasabut nga si Chan gitugkan na og kahadlok. Usa usab kini ka paagi aron pagpakaulaw sa iyang kaatbang sa pulitika.
Kadaghan na kong gihagad sa pagsulod sa pulitika. Apan tungod sa klase sa atong pulitika wa gyud ko mag-ambisyon bisag konsehal na lang sa barangay. Di nya ko makapugong kon buhatan kog di maong estorya.
Ang klase sa atong pulitika bisan pa kon ang pagpili sa kandidato sa adlaw sa piliay hi-tech na karon, naa gihapon ang paglabayay sa hugaw imbis nga ang isabwag unta ngadto sa mga botante mao ang plataporma sa usa ka kandidato o partido.
Dako pag usbanon ang atong sistema sa pulitika. Gani si Mariquita Salimbangon-Yeung nga modagan pagka mayor sa dakbayan sa Bogo batok ni Mayor Junnie Martinez nagpakita na og kahadlok ug pagduda sa atong sistema sa pulitika.
Matud pa ni Mariquita mga bisan pag mopadayon siya og dagan pagka mayor apan dili siya mangampanya kay nahadlok siya sa iyang safety o kaluwasan. Ang maong rason usa ka yubit sa iyang kaatbang sa pulitika.