DIHANG nabira sa usa ka towing company ang akong sakyanan sa miaging tuig, igo lang ko nagsabasaba dinhi sa akong kulom apan nibayad ra gihapon sa P2,100 aron makuha kini dayon.
Akong gihisgutan nga way klaro nga parking area nga gibutang ang Syudad sa Sugbo sa dalan V. Rama duol sa USC South Grade School ug problema gyud kaayo alang sa mga mokuha og tinun-an kon asa mo-parking. Lisod man gud kon ang kuhaon elementary kay kinahanglan sudlon ang tunghaan ug biyaan ang sakyanan sa gawas.
Ingon niini ang kahayahay sa negusyo nga towing. Way igong kaparkingan sa mga sakyanan unya kon maapiki, ingnon dayon nga dunay traffic violation ug birahon. Ginansya dayon ang towing company nga ang tag-iya suod ni Mayor Tomas Osmeña.
Karong bag-o, usa ka higala ang nabiktima sa towing. Apan lahi si Atty. Rex Fernandez sa ubang mga biktima sa towing kay siya nikiha gyud og damages.
Tan-awon nato karon kon unsay padulngan niining maong kiha ni Atty. Fernandez kay nasiguro ko nga ang linibo nga nabiktima niini hilom nga nagsuporta kaniya.
Di lalim kining pabayron og P2,100 aron malukat ang sakyanan nga nakahibawo man gyud kita nga kulang ang mga parking area dinhi sa Syudad sa Sugbo. Kon tarong pa kining liderato sa Syudad sa Sugbo, giuna unta nila ang pagbutang og dugang mga parking area aron wa nay rason ang mga motorista nga mobabag diha sa mga dalan.
Apan lahi man lagi ang mindset niining atong mga opisyal.
Bahala na ang mga motorista basta sigurado lang nga makakolekta ang Citom ug ang higala nga towing company. Nakahibalo na man sab kita nga kining dugang pangulekta sa syudad tungod sab sa dakong bayranan sa utang sa South Reclamation Project (SRP).
DUMPSITE
Maayo lagi kon mamunga dayon kining atong pagsakripisyo tungod sa SRP. Dugay pa ra ba gyud motubo ang mga negusyo sa maong dapit labi na kon di masulbad ni Mayor Tomas Osmeña ang kabaho nga gikan niining Inayawan dumpsite.
Kining kabaho sa dumpsite lain sab nga sakripisyo nga atong giantos. Ambot nganong wa tutoki sa mga opisyal sa Syudad sa Sugbo ang kamahinungdanon nga mabalhin dayon kini kay subra pa sa puno sa basura ang maong dapit. Gani, sa miaging bakasyon kay ang hangin naggikan sa amihan, moabot gyud sa among gipuy-an sa Carmenville, Syudad sa Talisay.
Wa lang makahasol si Mayor Tomas Osmeña sa iyang kaugalingong constituents diha sa Inayawan. Naapil ang iyang mga silingan sa Syudad sa Talisay. Hinuon, di man importante sa mayor ang di botante sa Syudad sa Sugbo so sorry na lang mga taga Talisay.
Ambot lang sab kining atong mga opisyal sa Talisay nga wa may eeek. Kon dinhi pa lang nagpuyo si Kong. Eddie Gullas kay mao ra man to ang dunay kaisog nga mosukol ni Mayor Osmeña.
Sigurado ko nga nalihok na kini. Apan di ba botante man ni Mayor Osmeña kining mga taga Inayawan? Aw, basin og ang tan-aw sa mayor simple lang kaayo. Basta modawat lang sa P50 ngadto sa P200 sa umaabot nga piliay, okay ra nga paantuson sa kabaho sa basura.
Bitaw, lisod espelingon kining hunahuna sa mayor. Kon iya pa lang giuna sa pagsulbad kining Inayawan dumpsite, gawas nga di siya mauwawan nga mokalit lang sa pagkasunog ug wa nay baho, modayed pa ang mga tawo kaniya ug mas sayon kumbinsiron ang mga investor nga mobubo og capital sa SRP.