NIADTONG Abril 21, 2018 takdo 21 ka tuig sukad nigawas ang unang isyu sa SunStar SuperBalita dinhi sa dakbayan sa Cagayan de Oro.
Sukad sa pagsugod niini hangtud karong panahona padayon kini nga gihangop sa among mga sumosunod kinsa maoy nihatag kanamo og kadasig sa matag-adlaw nga pagpaningkamot aron mahatud namo ang tukma nga mga impormasyon.
Ang Superbalita Cagayan de Oro adunay usa ka solemne nga responsibilidad diin anaa sa bisan unsang publikasyon. Ug mao kana ang hagit nga ang SunStar SuperBalita Cagayan de Oro, sukad sa pagsugod niini, nagpadayon hangtud niining mga adlawa.
Nagpadayon kami sa pag-amping, pag-ayo sa pagpili ug pag-andam sa bisan unsang kasayuran nga among ipaambit ngadto sa komunidad. Tungod kay dili lamang ang atong obligasyon ug katungdanan sa pagtabang sa pag-edukar, pagpahibalo ug paglingaw, apan usab ang Sun.Star Superbalita nisaad sa pagdala sa pinakalunsay nga kalidad sa usa ka impormasyon nga puno sa kamatuoran.
Karon, sa atong pagsaulog sa ika 21 nga anibersaryo sa Sun.Star Superbalita, kanunay namo nga gibag-o ang among dedikasyon ug pasalig sa pag-alagad sa komunidad pinaagi sa paghatag sa publiko sa among labing maayo ug dakung pag-alagad.
Gipasaligan namo kamo nga magpadayon kita sa pagbantay sa kamatuoran, pagtuboy sa integridad ug kredibilidad ug kami nagtuo nga tungod sa inyong suporta sa kami moabot pa sa daghan nga mga katuigan.
Gipahayag namo ang among dakong pasalamat alang sa inyong padayon nga suporta ug paghatag kanamo sa oportunidad nga mapakita sa komunidad ang among paningkamot.
Salamat sa tanan nga mga tawo nga kanunay nagtinguha nga makahibalo sa kamatuoran.
Mabuhay ang SuperBalita Cagayan de Oro!