AKSIDENTE sa kadalanan ang namatyan sa usa ka konduktor sa bus dihang nabanggaan siya sa usa ka Mitsubishi Prime Mover Truck niadtong Dominggo.

Ang insidente nahitabo sa alas 3:00 sa hapon didto sa Purok 7, Kilometro 24, Barangay Bunawan, siyudad sa Davao.

Gideklara nga dead on arrival sa Davao Medical Center (DMC) mao si Catalino Iba¤ez Namang, 47, minyo, nagpuyo sa dakbayan sa Tagum.

Ang blotter sa Bunawan Police Station nagbutyag nga ang biktima nabanggaan sa Prime Mover nga dunay plate number LWN-887 nga gipanag-iyahan ni Josephine Asis ug gimaneho ni Joel Boston, 25, nagpuyo sa San Vicente, siyudad sa Panabo.

Nasayran nga gikan ang truck sa Panabo paingon unta dinhi sa siyudad sa Davao ug gisundan sa Davao del Norte Express nga dunay Body Number 1030.

Dihang miabot sila atubangan sa Cidric Store sa Kilometro 24, Barangay Bunawan giingon nga giunhan sa maong bus ang truck hinungdan nga napugos ang drayber niini nga mopreno aron mahatagan og lugar ang maong bus.

Samtang mipreno ang drayber sa Prime Mover, mihunong sab ang bus daplin sa kalsad mao nga wala makontrol ang truck sa drayber niini mipaingon kini sa tuong bahin sa kalsada ug didto nabanggaan ang konduktor nga bag-o lang mikanaog gikan sa bus.

Si Namang nakaangkon og grabeng samad sa iyang kalawasan ug nadasmag ang truck sa balay nga gipanag-iyahan ni Helario Lumacao.

Ang biktima daling gitabang sa mga sakop sa ambulansiya sa Barangay Bunawan ug gidala ni Kagawad Sahid sa tambalanan apan dimalas kay nakabsan siya sa iyang kinabuhi.

Human sa maong hitabo, gitanggong ang drayber sa truck samtang giandam ang kasong reckless imprudence resulting

to homicide and damage to properties.(AD)