NAILHAN na sa otoridad ang mga suspek sa bag-uhay nga pagpamomba sa probinsiya sa Maguindanao.

Subay sa taho gikan sa Tactical Command Post sa 6th Infantry (Kampilan) Division sa Philippine Army nga banda alas 10:20 sa gabii, Enero 3, gipabuthan og bala sa M79 grenade launcher ang mansiyon ni kanhi Maguindanao Governor Datu Andal Ampatuan Sr, ug ang bala didto mitugpa sa likod nga bahin.

Pipila ka minuto ang nilabay, lain pang bala sa maong armas ang miigo sa gasoline station nga gipanag-iyahan sa pamilyang Ampatuan.

Dali-dali nga miresponde ang mga sakop sa 104th Brigade sa Philippine Army uban ang kapulisan, apan paspas sab nga nakasibat ang mga suspek.

Gipahayag ni Maguindanao Police Provincial Director Senior Supt Alex Meneses nga hut-ong sa Moro Islamic Liberation Front (MILF) ang ilang gitudlong suspek sa pagpamomba sa mansiyon sa pamilyang Ampatuan.

Gikomperma sab ni Rajah Buayan Municipal Mayor Jack Ampatuan nga giransak sa mga armado ang iyang bay, apil ang pinuy-anan sa iyang uyuan nga si Governor Datu Andal Ampatuan Sr, ARMM Governor Datu Zaldy Ampatuan, Sharief Aquak Municipal Mayor Anwar Ampatuan ug Maguindanao Acting Governor Datu Sajid Islam Uy Ampatuan.

Naghangyo si Mayor Jack Ampatuan sa militar ug kapulisan nga tutukan pag-ayo ang seguridad sa Maguindanao sa dili pa moulbo ang dakong kagubot.(Edgardo Fuerzas)