PRESYO sa Sinulog ticket karong tuiga nimahal og P50.
Ang tiket nga P350 kaniadto mapalit na sa P400 samtang ang 450 nahimo nang P500 ug ang P550 mapalit na karong P600.
Gipasalig hinuon sa Sinulog Foundation Inc. nga makapaabot gyud hinuon og bonggang performance gikan sa mga contingent ang mga tumatan-aw kay gipanindot kini nila karong tuiga kay mao ang ika-30 ka tuig sa Sinulog.
Atol sa tigom nga gipahigayon kagahapon sa SFI, gipahibawo ni Ricky Ballesteros, executive director sa SFI nga mas dako nga stage ang ilang gamiton karong tuiga.
Gipatas-an usab nila ang premyo karon sa Sinulog sa Kabataan sa siyudad ug lalawigan gikan sa P40,000 alang sa unang ganti, gihimo na kini nila karong P100,000.
Pabilin pa hinuon gihapong makadawat og subsidy ang mga tunghaang mosalmot diin P50, 000 alang sa mga local participant ug P100,000 alang sa out-of-town contingent.
Magpabilin ra hinuon ang naandang premyo sa Sinulog grand parade.
Samtang si Bise Mayor Michael Rama naninguha nga katugtan gyud ang siyudad nga makapagawas og financial assistance alang sa SFI.
Matod ni Rama nga iyang pakigkitaan karong semanaha ang Commission on Audit (Coa) aron ipasabot nganong kinahanglang mohatag og hinabang sa SFI. (CPL)