Dalaga gipusil patay sa NorCot

PATAY ang usa ka dalaga human gipusil sa mga armadong grupo sa probinsiya sa Cotabato.

Kapulisan nag-ila sa biktima nga mao si Lysa Dialen, 23 anyos, ug molupyo sa barangay Poblacion Kabacan.

Basi sa taho gikan sa Cotabato Police Provincial Office, nasuta nga banda alas 4:00 sa hapon, Enero 3 nahitabo ang krimen.

Samtang sakay ang biktima sa iyang XRM nga motorsiklo gikan sa pinuy-anan sa iyang barkada pauli na unta sa ilang bay, giharang kini sa duha ka wala mailhing suspek ug gipusil gamit ang kalibre .45 nga pistola.

Patay si Dialen nga naka-angkon og samad pinusilan sa iyang likod ug dughan.

Mga suspek dali nga miiskapo paingon sa wala matino nga direksyon dala ang motorsiklo sa dalaga.

Matud ni Rosemarie Manubag, ig-agaw sa biktima, nga sakay sab sa XRM, nga kalit kaayo ang hitabo ug wala sab nila mailhi ang mga suspek gumikan kay nagtaptap sila og panyo sa ilang nawong.

Maayo na lamang kay dali siya nga nakadagan paingon sa luwas nga dapit.

Duha ka mga anggulo ang gilantaw ni Kabacan Municipal Mayor George Tan sa pagpatay sa dalaga.

Una, carnapping sa rason nga gidala sa mga mamumuno ang motor sa biktima ug ikaduha mao ang personal nga atraso gumikan kay si Dialen lang ang gipusil sa mga suspek.

Ang kapulisan padayong nag-imbestiga aron gyud masuta ang tinuod nga hinungdan sa hitabo, ug madakpan ang mga suspetsado.(Edgardo Fuerzas)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph