USA ka mag-amahan pulos nadala sa ospital human gipusil sa ilang silingan didto sa Purok 2, Barangay Sta. Maria, lungsod sa Nabunturan, Comval Province, Sabado sa hapon.

Mga biktima giila nga sila Theodoro Loreto ug ang anak niyang si Erick Jhon Loreto, pulos hamtung ang panuigon, ug molupyo sa dapit.

Samtang ang suspek mao si Ricky Migabon, hamtung ang panuigon.

Sa report nga nakuha gikan sa Comval Province Police Provincial Office nasayran nga nahitabo ang pagpamusil pasado alas 4:00 sa hapon.

Sumala pa nga samtang nagkapuliki og panday ang amahan ug anak sa kural nga ilang gibutang palibot sa ilang panimalay, kalit miabot ang asawa sa suspek nga nailhang si Erlina Migabon uban ang bana niini nga si Ricky.

Nagkalais si Erlina ug ang asawa sa biktimang si Theodoro nga mao si Leonela.

Apan ang nahisgutang lalis misangko sa pagpusil sa suspek ngadto sa mga biktima gamit ang sumpak.

Mga biktima nahiagum og samad pinusilan sa kalawasan ug daling gipangdala sa ospital.

Samtang ang suspek mitahan sa iyang kaugalingon ngadto sa mga otoridad.

Kapulisan sa lungsod sa Nabunturan mihimo na og imbestigasyon sa nahisgutang hitabo.

Ang kasong frustrated homicide gihikay na sa kapulisan batok sa suspek. (Marvin Pineda)