USA ka lalaki ang gipusil patay sa wa mailhing mga suspetsado nga lulan sa motorsiklo didto sa Barangay Visayan Village, dakbayan sa Tagum, Dominggo sa hapon.

Giila ang biktima nga mao si Jessie Almodel, 19, ug molupyo sa Purok Buli I, sa susamang barangay.

Sa report gikan sa Tagum City Police Station nasayran nga pasado alas 4:45 sa hapon, nag-inom ang biktima sa tindahan sa iyang silingan didto sa dapit, dihang kalit miabot ang wa mailhi ug wa matino nga gidaghanon sa mga lalaking sakay sa usa ka Honda Wave nga motor.

Sa way paglangan gipusil ang biktima gamit ang wa pa matinong kalibre sa armas.

Samad pinusilan sa kalawasan ang naangkon ni Almodel nga miresulta sa iyang kamatayon.

Mga suspek dayong misibat padulong sa wa matinong lugar human sa pagpamusil.

Sumala sa mga nakasaksi nga ang suspek nga mipusil sa biktima nagsul-ob og sweatshirt nga kolor orange ug puti samtang ang kauban niini ang nagpaabot lamang sa ilang get- away nga motor.

Ang ka-live-in partner sab sa biktima misulti nga sa milabay nga adlaw dunay nangita sa biktima nga nagpailang usa ka alyas Jing.

Kapulisan sa dakbayan sa Tagum mihimo na karon og dugang imbestigasyon sa hitabo.