CNMI, Saipan ? Disgrasya sa karsada ug sa dagat nagpasuwahi sa miaging semana. Basi sa pagpaniid ang sayop sa nagmaniho maoy hinungdan.

Overloading ang gitumbok nga hinungdan sa nahitabong trahedya sa Masbate nga naglambigit sa MB Don Dexter.

Karon, gibasol sa mga biktima ang tagdumala sa bangka.

Kinsa man gyud ang napabaya? Para nako mas maayong itutok ang responsabilidad sa gobiyerno. Asa naman diay ang Coast Guard nga maoy mokontrol sa gidaghanon sa mga pasahero?

Mohunong na unta og himog magic kining Coast Guard kay katingad-an kaayo mahibaw-an nato nga sobra sa manipesto ang mga pasahero kon mahitabo na ang trahedya. Giunsa man diay pag-inspection nila?

Human sa trahedya sa Masbate nagdesider ang Coast Guard nga mopuwesto na sila sa pantalan,ug ang Hunta Probinsyal mipasar og balaodnon nga nag-obligar sa pagpasul-ob og life vest sa mga pasahero. Ingon ani nalang gyud kanunay ta. Prevention unta ang prioridad ug dili kay maghulat ta sa trahedya una pa mohimo og panagang.

Ang ulahing disgrasya sa Bukidnon nga naglambigit sa trak de karga ug van for hire dili ikatingala. Hangtod nga ania kining kakuwang og pasensya, kakuwang og disiplina sa mga drayber dili mahunong kining disgrasya sa karsada.

Dire sa Saipan, ang mga drayber nga Pinoy napitol gyud kay kanunay nakatutok ang mga polis sa overspeeding.

Minus usab ang overtaking dire. Minus usab ang disgrasya sa kadalanan.

Dunay ferry boat gikan sa Saipan nga mobiyahi sa Tinian ug isla sa Managaha, pero dili gyud mahitabo nga mag-overloading. Walay Coast Guard nga mo-inspection pero grabe ka estrikto ang tagdumala batok sa overloading.

Nagpasabot kini ? malikayan gyud ang disgrasya kon tumanon lang ang balaod uban sa disiplina sa drayber.

Dili pa ulahi dunay dakong kahigayonan sa pag-usab. Hagiton nato ang mga tawo nga dunay katungdanan sa pagpadagan sa transportasyon - gobiyerno, tag-iya, drayber ug bisan ang mga pasahero? Atong tamdan ang balaod sa kasegurohan ug kaluwasan.

Hunongon usab nato ang pagbasol sa kinaiyahan bisan kon tataw kaayo nga sayop sa tawo? Ang Ginoo pa maoy basolon.

Karong Nobiyembre mobiya na dire si welfare officer Lourdes Mabagal ug mobalik diha sa OWWA sa Cagayan de Oro. Akong pasalamat ni Ma'am Mabagal pagsuporta sa media dire sa Saipan .