USA ka patayng lawas ang nakaplagan sulod sa lawak kagahapon mga alas 10:00 sa buntag sa Durian St., Carmen ning siyudad sa Cagayan de Oro.

Giila ang biktima nga mao si Joel John Nacalaban, 46, minyo, taga Kisanlu, Iponan ning siyudad.

Si Police Inspector Victor Villanueva sa Scene of the Crimes Operatives nibutyag sa Sun.Star Superbalita nga dali silang miresponde human nakadawat og tawag kalabot sa usa ka patayng lawas.

Apan gibutyag niini nga wala silay nakitang samad dinunggaban o pinusilan nga posibleng hinungdan sa kamatayon sa biktima.

Sa inisyal nga imbestigasyon nasayran nga sa wala pa namatay ang biktima nakig-inom pa kini sa mga higala niadtong Domingo sa gabii ug daghan usab ang nakaon niini.

Nag-inusara lamang ang biktima sa giabangang boarding house niini niadtong tungora.

Namatikdan nga wala na nagmata kagahapon sa buntag ang biktima hinungdan nga gituktok ug nakita na lamang nga nagbuy-od og walay kinabuhi.

Dugang ni Villanueva nga walay silay nakitang foul play sa kamatayon kung ugaling gihiloan o naghikog kini tungod kay kay walay namatikdang mga butang sulod sa lawak.

Dako ang pagtuo sa kapolisan nga adunay gitagong sakit ang biktima ug giatake hinnugdan nga nakabsan sa kinabuhi.

Sa pagsulat ning balita ang patayng lawas gidala na sa puloy-anan sa biktima sa Kisanlu, Iponan. (SVB)