KRITIKAL ang kondisyon sa usa ka sakop sa Civilian Auxillary Force Geographical Unit (Cafgu) human giluba ug nahabwa ang tina-i.

Giila ang biktima nga mao si Rumolo Rahinan, 41, minyo, lumad nga taga lungsod sa Agsabo, Agusan del Sur.

Giduso ang biktima sa Northern Mindanao Medical Center (NMMC) sa mga sakop sa 4th Infantry Division niadtong adlawng Domingo mga alas 9:00 sa gabii tungod sa nagkagrabeng sitwasyon sa biktima human nahitabo ang pagpangluba niadtong nilabayng adlaw.

Nasayran gikan sa personahe sa NMMC nga nahitabo ang pagpangluba sa mismong lugar niini samtang kuyog sa mga kauban nga nanaygon.

Giingong nananghid ang biktima nga adunay lakwon dihang gitabo sa usa ka wala mailang lalaki nga adunay dala nga sundang.

Deretso dayon nga giluba sa tiyan nga bahin si Rahinan hinungdan nga nalaslas ug nahabwa ang tina-i niini.

Wala pa nakuntento ang suspetsado, gitigbas pa ang likod niini makaduha ka higayon hinungdan nga nilapos sa kilid nga bahin.

Gidala ang biktima ning siyudad sa Cagayan de Oro nga giingong giatiman sa 4ID apan tungod sa grabeng sitwasyon giduso sa NMMC.

Ning panahona padayon pa nga giatiman sulod sa balay tambalanan ang biktima.

Gituohang paregla ang motibo sa suspetsadong miluba human nasayran nga maayo ug buotan nga tawo ang biktima.