NAUKAY na sab ang katawhan human mibutho ang taho nga may 'special treatment' sa mga akusado sa Maguindanao massacre nga gikalambigitan sa pamilyang Ampatuan.
Sa report, gihatagan sumala pa og ispesyal nga pagtagad ang suspendidong si Autonomous Region of Muslim Mindanao Governor Zaldy Ampatuan ug kanhi acting Maguindanao Governor Sajid Ampatuan nga karon anaa sa Camp Fermin G. Lira Jr. sa General Santos City.
Tungod niini, nagsubo ang kampo sa mga pamilya sa mga biktima sa daw paghatag og maayong pagtagad sa gobyerno sa mga tawong may kalambigitan sa mangilngig nga pagpatay sa 57 ka mga tawo.
Sa sulat pamahayag nga gipaabot sa militar, gipaniguro sa Eastern Mindanao Command pinaagi sa ilang tigpamaba nga si Police Superitendent Ranulfo Cabangbang nga walay ihatag nga 'special treatment' kang kanhi gobernador Andal Ampatuan Sr., nga anaa sud sa Camp Panacan Hospital ning siyudad.
Si Andal Sr., nagpabiling gikustodiya sa maong military hospital aron masiguro ang iyang kahimsog sa panglawas, lakip na iyang seguridad.
Ang kanhi gobernador unang gisulod sa Davao Doctors Hospital apan pugsanon siya nga gibalhin sa Camp Panacan Hospital, tungod kay buot sa militar nga mabantayan og maayo ang kanhi gobernador.
Dugang pahayag ni Cabangbang nga kun gitutukan man nila ang kahimtang ni Ampatuan Sr., kini tungod sa iyang balatian.
Sumala niya nga padayon ang ilang pag-monitor sa iyang presyur sa dugo tungod sa iyang sakit nga hypertension lakip na ang diabetes.
Mibahad na sab ang kampo ni Vice Mayor Esmael 'Toto' Mangudadatu nga pasakaan nila'g kaso ang mga otoridad nga mapamatud-ang mohatag og VIP treatment sa mga akusado sa Maguindanao massacre. (ROG with PR)