HUMAN ang malampusong pagka-diskubre sa kinilong coccaine nga nagbalor og kapin P100 milyon ka pesos, nakadawat og pasidungog ang mga opisyal sa Davao City Police Office ug Sasa Police Station.

Sila gihatagan og pasidungog tungod sa dakong tampo nga ilang natunol aron mapitol ang pagkuyanap sa ilegal nga druga dinhi sa dakbayan.

Kahinumduman nga napalgan sa mga otoridad ang walo ka kilo nga high-grade nga cocaine nga gisulod sa container van ug gibutang sa dakong hawan sa kanhi airport sa Sasa, dakbayan sa Davao, niadtong Disyembre.

Sa spot report sa Sasa Police Station, unang nakuha ang tulo ka pakete sa cocaine sulod sa reefer van nga dunay numero MWCU-612835 human nakita sa technician nga si Mr. Pelaez.

Si Pelaez na ang mipahibawo sa kapulisan mao nga miresponde si Police Chief Inspector Alden Delvo ug didto nakita nila ang laing usa ka pakete sa cocaine.

Dihang gisusi sa kapulisan uban ni Investigation Detection and Management Section (IDMS) Police Superintendent Antonio Rivera ang maong lugar, ilang nakita ang laing upat pa ka pakete nga gisulod sa reefer van nga dunay numero MWCU-6047633.

Mga opisyal nga nakadawat sa 'Medalya ng Kagalingan' mao sila Davao City Police Office Director Senior Superintendent Ramon Apolinario, Sasa Police Station Commander Chief Inspector Alden Delvo, Police Superitendent Antonio Rivera, Senior Inspector Jaide Demaala ug Seniro Inspector Alfredo Baluran.

Mapasalamaton ang mga gipasidunggang opisyal sa ilang mga ginsakpan tungod kay kun dili pa tungod sa ilang kooperasyon di magmalampuson ang ilang kampanya batok druga.

Mismong si Davao City Mayor Rody Duterte natahap na nga may usa ka shabu laboratory nga nag-operate sa usa sa tulo ka distrito ning siyudad.

Gibase niya ang iyang katahap sa kalit nga pagsaka sa power consumption sa maong distrito nga gidudahan. Ang mayor wala mag-ila sa maong lugar.

Atol usab sa gihimong awarding nga gihimo sa Camp Catitipan bag-uhay lamang, gihagit ni Sr/Supt. Benito Bianzon ang kapulisan nga pakusgan pa ang ilang kampanya batok ilegal nga druga. (ROG)