USA ka mag-uuma gipusil, patay sa probinsiya sa Cotabato.

Ang kapulisan nag-ila sa biktima nga mao si Teng Abidin, 42 anyos, minyo ug molupyo sa barangay Radjamuda, Pikit.

Sigun sa taho gikan sa Cotabato Police Provincial Office nga banda alas 3:45 sa hapon, Enero 4, mipalit og cellphone ang biktima sulod sa public market sa poblacion sa Pikit sa diha nga kalit kining giduol sa duha ka wala mailhing mga suspek ug gipusil gamit ang kalibre .45 nga pistola.

Patay diha dayon si Abidin nga naigo sa iyang ulo ug dughan samtang ang mga mamumuno dali nga misibat sakay sa motorsiklo paingon sa wala matino nga direksyon.

Matud ni Marimfa, nga sa wa pa gipatay ang iyang bana,

gika-engkwentro niya ang mga armadong grupo sa ilang dapit nga nagpayuhot sa gidiling druga.

Gipahayag ni Pikit Chief of Police Senior Inspector Elias Dandan nga duha ka mga anggulo ang ilang gisundan sa pagpatay sa biktima ug kini mao ang away sa yuta ug personal nga atraso.

Ang kapulisan naningkamot sa ilang imbestigasyon aron gyud masuta ang tinuod nga motibo sa pagpatay sa mag-uuma sa ingon nga madakpan ang mga suspetsado.(Edgardo Fuerzas)