GIILA sa iyang amahan sa buhatan sa kwerpo sa kapulisan ang lalaking gipatay didto sa lungsod sa Hagonoy, Davao del Sur.

Niadtong Lunes, niabot si Jose Maravillas didto sa Hagonoy Police Station ug nagsulti nga iyang anak ang lalaking nabangalan nga nabulit sa samad pinusilan ang lawas samtang nagbuy-od sa dalan ug naligo na sa iyang kaugalingong dugo, Sabado sa gabii.

Ang gipatay nailhan nga si Joefil Maravillas, 31, ulitawo ug molupyo sa Barangay Poblacion, sa lugar.

Nilutaw sa otopsiyang gihimo sa mga otoridad nga dunay mga samad igo sa kalibre .45 ang lawas ug ulo sa biktima.

Kahinumduman nga nakit-an ang biktima sa mga niagi sa dalan nga mga batan-on nga wa nay kinabuhi samtang nagbuy-od sa sa Barangay crossing.

Si Police Officer 2 Mario Olegario, nag-imbestiga sa kaso, nagkanayon nga di pa nila masuta kun unsay motibo sa pagpatay.

Matud sa kapulisan, nga ila na gisubay kun unsay trabaho sa biktima ug kun kinsa ang mga gikabikil niini aron makatabang sa pagsulbad sa kaso.

Gitun-an na sab sa Philippine National Police Crime Laboratory ang unom ka mga baseyong bala sa kalibre .45 nga nahipus sa mga otoridad didto sa lugar sa nahitabuan.

Matud ni Olegario, ilang paningkamutan nga masulbad ang kaso. (Dondon Dinoy)