USA ka lalaki ang namatay human gipusil og shot-gun ug pagkahuman gitigbas pa gayod sa wa mailhing mga suspetsado didto sa Barangay Little Panay, dakbayan sa Panabo, Domingo sa gabii.

Giila ang biktima nga mao si Virgilio Palomares, 53, ug molupyo sa maong barangay.

Sa report gikan sa Panabo City Police Station nasayran nga nahitabo ang pagpamusil pasado alas 8:00 sa gabii.

Sa inisyal nga pakisusi sa mga otoridad nasuta nga sa wa pa nahitabo ang pagpamusil, nakadungog og paghot sa iro ang biktima ug ang iyang igsuon nga si Jonathan Palomares duol lamang sa ilang balay.

Sa dihang gisusi ni Jonathan ang kasikas, kalit lamang siya gipusil sa duha ka wa mailhing mga suspek gamit ang 12-gauge shotgun.

Apan maayo na lamang kay nakadagan sa ngitngit nga bahin sa lugar si Jonathan mao nga wala siya maigo.

Aron matabangan ang iyang igsoon, migawas sab si Virgilio dala ang sundang aron gukdon ang mga suspek.

Apan naunhan siya sa mga suspek ug gipusil gamit ang dala nilang mga armas.

Wa pa natagbaw ang mga suspetsado, gitigbas pa nila ang biktima gamit ang sundang niini.

Samad pinusilan ug tinigbasan sa kalawasan ang nahiaguman sa biktima hinungdan sa iyang kamatayon.

Mga suspek abtik nga misibat padulong sa wa matinong lugar human sa hitabo.

Mga miresponding kapulisan nakahipus og mga baseyo sa 12-gauge shotgun nga maoy gituohang gigamit sa mga suspek.

Nagtuo ang mga otoridad nga posibleng bikil ang motibo sa pagpamusil.

Gihimo usab karon ang dugang imbestigasyon ug gilutos na ang mga suspek.(Marvin Pineda)