PATAY ang 19 anyos nga ulitawo human natripan dayon giluba niadtong Lunes mga alas 9:20 sa gabii sa Centro Talakag, Bukidnon.

Naigo ang likod nga bahin sa lawas ni Dennis Silaynon nga gituohang nilapos sa kasing-kasing.

Nasayran gikan sa inisyal nga imbestigasyon sa kapolisan sa Talakag Police Station nga nikuyog si Silaynon sa iyang mga mga higala paingon sa sentro nga bahin sa maong lungsod aron maglingaw-lingaw.

Paghidangat sa usa ka vediokihan sa maong dapit nakadesisyon nga mokanta sa maong videokehan ang gurpo.

Usa ka laing grupo sa mga batan-on ang anaa sa pikas nga lamesa niadtong higayona nga gituohang mga hubog na samtang nagkanta.

Dihang miduol si Silaynon sa videoke aron mohulog og kwarta kalit kining giduolan sa usa sa lalaki gikan sa usa sa lamesa ug deretso nga giluba gamit ang dala niining kutsilyo.

Giluba sa likod nga bahin ang biktima hinungdan nga nilapos sa atubangan nga bahin. Human sa hitabo deretso sab nga misibat ang suspetsado nga wala na naabtan sa kapolisan atol sa pagresponde.

Tungod sa lawom nga samad nga naangkon sa biktima ug naligo na sa kaugalingong dugo gidali pagdala ang biktima sa Northern Mindanao Medical Center (NMMC) ning siyudad sa Cagayan de Oro mga alas 10:30 sa gabii.

Apan usa ka oras ang nilabay sulod sa emergency room nakabsan sa kinabuhi si Silaynon. Giingong naigo ang kasing-kasing sa biktima gawas nga daghan sa dugo niini ang nawala.

Gibutyag sa mga hingtungdan sa biktima nga kasubo ang ilang gibati sa nahitabo sa biktima tungod kay buotan ug walay libog si Silaynon, gani wala kini kaaway sa lugar.

Sa pagsulat ning balita ang kapolisan sa Talakag Police Station padayon pa sa paghimo og dugang imbestigasyon aron pag-ila sa suspetsado ingon man pagsikop niini aron makab-ot sa hingtungdan ang hustisya nga ilang gipangayo ning panahona.