ANGAY nato nga hinuktokan ang nahitabo sa dakbayan sa Gingoog niadtong katapusang adlaw sa tuig 2009, Disyembre 31 mga alas 7:00 sa gabii dihang nakabsan sa kinabuhi ang inahan ug anak tungod sa firecrackers.

Diha-diha nga nakabsan sa kinabuhi sila si Jocelyn Amoroto-Guibone ug 5 anyos nga anak niini nga si Joross dihang niulbo ang gipanag-iyahan nga stall nga puno sa baligya sa pabuto sa Trinidad Baol St., Brgy. 22A siyudad sa Gingoog.

Ang nakasakit pa gyud kay ang amahan mismo ang nagpabuto sa maong firecrackers apan tungod sa kakusog niini nikaylap ngadto sa ilang stall ang kalayo hinungdan sa sunog. Sulod sa maong stall ang 5 anyos nga bata kinsa natulog niadtong higayona. Dihang niulbo ang kalayo gibalikan sa inahan ang iyang anak apan disgrasya nga wala na kini makagawas tungod sa pagbuto-buto na sa mga baligya nila nga mga pabuto.

Sunog ug dili mahitsura ang lawas sa duha ka mga biktima dihang dali nga girespondihan sa mga sakop sa Bureau of Fire Protection.

Kong atong lantawon wala man gyuy ihatag nga kaayohan kining pagpabuto. Bisan sa padayon nga kampanya sa Department of Health apan nagkataas gihapon ang mga biktima matag-tuig. Dire nato makita unsa ka gahi ang ulo sa mga tawo, hangtud dili mabuthan dili gyud kini malugda sa pagpabuto.

Unsa ba intawon ang makuha nila niini nga kong hunahunaon nag-usik lamang kini og kuwarta.

Busa dili nato paabuton nga maputlan kita sa mga kamot o ang mas labing sakit makalas pa ang kinabuhi sa sakop sa imong pamilya tungod sa walay hinungdan nga pagpabuto og firecrackers.

DALAYGON

Kanus-an pa man intawon hingpit nga idili kining tanang matang sa mga pabuto? Kong nahimo sa dakbayan sa Davao ang pagdili niini nganong dili man sa atong lugar?

Niadtong nilabay nga pagsaulog sa Pasko ug Bag-ong Tuig sa dakbayan sa Davao walay natala nga nabuthan sa firecracker. Kini timaan lamang kon unsa ka estrikto ang ilang pagpatuman sa balaod, estrikto apan insakto.

Mapasigarbuhon kaayong moingon ang mga taga Davao nga "zero casualty" sila.

Kanus-an pa man usab kita mosunod kanila?