CIDG-GenSan gisaway sa mga abogado sa DavSur

NANGYAM-ID ang mga abogado sa lalawigan sa Davao del Sur human miguwa ang taho nga adunay nahitabong special treatment sa Criminal Investigation and Detection Group (CIDG) ngadto sa pamilyang Ampatuan didto sa dakbayan sa General Santos.

Nabulgar ang pasangil nga gihatagan og VIP treatment ang upat ka mga sakop sa pamilyang Ampatuan kinsa anaa sa kustodiya sa rehiyonal nga buhatan sa CIDG sa maong siyudad.

Usa si kanhi Davao del Sur Integrated Bar of the Philippines (IBP) President Lawyer Israelito Torreon, ang nakasaway sa giingong paghatag og maayong tratamento sa CIDG ngadto sa mga akusado.

"The alleged VIP treatment of Ampatuan by CIDG-GenSan, if true, deserves to be corrected as it highlights the reported double-standard treatment of police officers of detained prisoners according to their economic standing," pahayag ni Torreon.

Subay sa maong alegasyon, gikataho nga ang mga reporter sa Bombo Radyo-General Santos nga sila si Salvador 'Boy' Galano ug Joel Eduque ug ilang drayber maoy nakakita nila Zaldy ug Sajid Ampatuan, nga kauban nila ni Senior Police Officer 4 Alex Pedroso ug usa ka Senior Police Officer 3 Militante atubangan sa CIDG office niadtong Disyembre 31.

Ang upat gihulagway nga anaa sa usa ka taas nga lamesa nga gibutangan og pipila ka mga plastic bags sa pagkaon, apan sa dihang nakit-an ang pag-abot sa sakyanan sa taga Bombo-Radyo, giingong nagdali ang duha ka mga Ampatuan sa pagbalik sa ilang selda, pahayag ni Galano sa iyang sworn affidavit.

Bisan si Lawyer Leonardo Suario nagkanayon sa Sun.Star Superbalita nga angayan susihon ang maong alegasyon.

"If true, then it does not advance the cause of our judicial system. It reinforced the idea of discrimination," matud ni Suario.

Gipasabot ni Suario nga way si bisan kinsang hatagan sa gobyerno og espesyal nga pagtagad samtang anaa sa selda sa kapulisan bisan pa man og adunay espesyal nga okasyon.

"What the government did to others must also be done to them otherwise there is discrimination," niya pa.

"Under the law, persons similarly situated must be similarly treated. This is the essence of the equal protection clause," dason sa abogado.

Bisan si Digos City Vice Mayor Lawyer Joseph Penas, nagsulti nga law-ay kaayong paminawon ang gipakitang maayong pagtagad ngadto sa mga tawong suspetsado sa pagpatay sa 57 ka mga tawo lakip ang mga sakop sa media niadtong Nobyembre 23 sa miaging tuig.

"It is unethical. It should be dealt by law," matod ni Penas.

Hinuon, gipasalig sa nasyonal nga buhatan sa CIDG nga ilang susihon ang pasangil human nadawat ang taho. Si Senior Superintendent Benito Estipona maoy nangulo sa imbestigasyon.