GIPALIBUTAN og police yellow line sa kapulisan sa Mandaue city ang gisugdan nga proyekto ni Kongresista Nerissa Soon-Ruiz, 6th District sa dalan R..T. Colina, barangay Ibabao human gibabagan ni Mayor Jonas Cortes kagahapon.
Si Cortes nagdalag Swat team sa iyang pag-adto sa dapit tungod niini, ang kampo ni Ruiz nihingan kang Cortes nga ignorante kay dugay ra silang nipahibawo sa City Hall nga ipatuman ang proyekto, apan wa silay tubag nga nadawat.
Gisaway ni Cortes ang proyekto ni Ruiz nga rehabilitation sa dalan R.T. Colina nga nagkantidad og P500, 000 ug giingong insulto alang sa mga Mandauehanon, dili lang sa local official sa siyudad.
“I want to put things in proper perspective. Wa silay coordination o consultation sa LGU,” matod ni Cortes.
Matod ni Cortes nga pag-usik-usik lang sa pundo ang gihimo sanglit nagsapaw kini sa existing project sa siyudad nga pagpaayo sa drainage.
Makita nga giguba ang dalan ginamit nga nagsilbi nga access road nga molapos sa Ibabao ug sa North Road.
“Mora nagbugalbugal ang ilang gihimo ngadto sa Mandauehanon,” dason sa mayor.
Nipahibawo siya nga nagtinguha sila nga mosang-at og reklamo ang dakbayan batok sa Department of Public Works and Highways (DPWH) nga destruction of public property.
Samtang si Atty. Gonzalo Malig-on, chief of staff ni Ruiz, nitataw nga wa silay gihimong pagsapaw sa proyekto sa siyudad.
Gani niadtong Oktubre 8 nipadala ang buhatan ni Ruiz og suwat diin natala ang mga proyekto nga ipatuman niini.
“Up to now, way tubag ang mayor sa among suwat. He should reply to our letter officially. Asa man dapita nga way coordination?” pulong pa Malig-on.
Giklaro usab ni Malig-on ang labot sa laing proyekto sa kongresista sa barangay Tingub nga nagsemento sa dalan paingon sa Tipolo Creekside Homeowners Association nga naresolbar na sa kaso.
Matod niya nga ang partisipasyon sa kongresista mao lang ang pag-provide sa pundo alang sa proyekto ug ang DPWH mao nay mopahiluna sa pagpatuman niini.
Sa iyang pamahayag nga gipadala sa Sun.Star Superbalita, si Ruiz nikondenar sa iyang gihulagway nga “terrorism by the mayor of Mandaue for using brute force in stopping sa national project that could benefit Mandauehanons.”
Si Ruiz niingon nga sukad pa kaniadto nga kanunay siyang mopahibawo sa City Hall kon duna siyay proyekto aron way duplikasyon ug nga ang pundo sa Siyudad maayo nga pagkagasto.
“The City is in need of road concreting. The mayor should not have stopped the work or else he deprives the Mandauehanons of a project that serves them,” dugang ni Ruiz.(FVQ)