WA moangkong sad-an si Datu Unsay Mayor Andal Ampatuan Jr. sa 41 ka mga kasong murder dihang gibasahan siya kagahapon sa iyang kaso.

Si Andal Jr., kinsa gipusasan samtang gihusay ang iyang kaso, nga di kaayo makamao mag-Englis ug Tagalog, nisugot nga basahon ang impormasyon batok kaniya sa Englis.

For updates from around the country, follow Sun.Star on Twitter

Ang mayor gipasanginlan sa kamatayon sa 57 ka mga tawo, lakip ang mabdos nga mga babaye nga paryente sa iyang kaatbang sa pulitika ug 30 ka mga tigbalita, sa lalawigan sa Maguindanao niadtong Nobyembre 23.

Si Atty. Sigfrid Fortun, abogado ni Andal Jr., nisugot sa tinguha ni Assistant Chief State Prosecutor Richard Anthony Fadullon nga ang iyang kliyente ipaubos sa arraignment una ang hearing sa ilang gisang-at nga petisyon nga makapiyansa.

Adunay gamay nga problema sa wa pa ang pagbasa sa impormasyon sa kaso dihang si Fortun nipahibawo nga si Andal Jr. di kaayo makamao mag-Eninglis o kaha Tagalog, bugtong Maguindanaoan ra ang iyang masabtan.

Niini, ang huwes niawhag kang Fortun nga ipangutana ang mayor kon mahimo ba siyang i-arraign pinaagi sa pagbasa sa English o kaha Tagalog. Nisugot si Andal Jr. nga basahon sa Englis.

Ang korte nibasa sa 41 ka mga impormasyon ngadto kang Andal Jr. ug wa siya moangkon sa tanang 41 ka mga kaso nga gipasangil kaniya.

Si Quezon City Branch 221 Judge Jocelyn Solis-Reyes wa mosugot sa tinguha ni Fortun nga sugdan ang preliminary conference sa kaso una ang presentasyon sa mga testigo sa ilang gisang-at nga petisyon aron makapiyansa ang iyang kliyente.

Ang korte nipadayon sa husay ug si Atty. Ricardo Diaz, nangulo sa National Bureau of Investigation (NBI) counter-terrorism unit, kinsa maoy gimanduan nga moadto sa Maguindanao usa ka adlaw human sa masaker, maoy unang nitestigo.

Iyang gihulagway nga didto siya sa Maguindanao lakip na ang pagkuha sa mga testimoniya sa lima ka mga testigo ug pagkuhag hulagway sa dapit nga nahitabuan sa krimen ug uba pa.

Wa una mo-cross-examine kang Diaz si Fortun, kay niya pa ang testimoniya ni Diaz way kapuslanan.

Gipresentar usab ni Diaz ang “flash drive” nga gipahibawo niya nga adunay sud nga 30 ngadto sa 40 ka mga hulaway nga nakuha sa militar.

Si Assistant chief state prosecutor Fadullon niawhag sa korte nga dawaton ang flash drive isip parte sa ebidensya apan nisupak si Fortun kay di si Diaz ang nikuha sa mga hulagway.

Alang sa paghusay sa piyansa, ang prosekusyon nagtinguha nga mopresentar og 11 ka mga testigo apan ang huwes nihangyo nga minusan ang gidaghanon sa ilang testigo.

Samtang, si Atty. Harry Roque, kinsa maoy abogado sa mga kabanay sa gipamatay nga mga tigbalita, nihangyo sa korte nga si Andal Jr. ibalhin sa Quezon City Jail ug isipon nga usa lang ka ordinaryong kriminal.

Ang korte mopagawas unya og hukom ning tinguha ni Roque. Ang sunod nga husay sa kaso gikatakda unya sa Enero 13.