SULOD na ang inilog nga Saint Mary’s School ug tulo pa uban sa top 4 sa Northern Mindanao qualifying eliminations sa Shakey’s V-League Season 13 karong Agosto 28-31.
Apan sa dili pa sila mokombati sa regionals, tiwason sa nila ang semifinals sa Cagayan de Oro qualifying games diin maatbang sa SMS lady spikers ang dark horse sa liga nga ang Angelicum Learning Centre (ALC) sa una nga dula karong Sabado sa Corpus Christi gymnasium.
Sa tinaparay, gilangkoban ang SMS sa tag-as nila nga linya, nga dili moubos sa 5’8 nga height, diin sila Erika Raagas, Kaye Navarro ug Abbe San Juan ang mohatag og opensiba ug depensa sa first line.
Naa pa si Kiara Cruz nga nikuha og pipila ka ace sa iyang jumping serve. Sa ilang kadaogan batok sa Carmen National Highschool sa elimination round, si Cruz nitala og lima ka ace.
Halos latos nga kadaogan ang naangkon sa SMS apan didto sila naglisod sa Capitol University Basic Education Department (Cu-bed) sa quarterfinals.
Nibinat og lima ka puntos nga labaw ang SMS sa una nga set, 14-9, apan namugnaw lang kalit diin nakabwelo ang CU-BED pagtabla sa 14-tanan ug gikan diha nahimong hingpit nga away.
Nahutdan og pwersa ang Cu-bed pagsulod ni San Juan aron makontrolar ang dula.
Wala na dayon nagkompyansa ang SMS sa ikaduha nga set aron moabante sa regionals.
“Namugnaw lang gyud sila didto nga punto. Nagkompyansa lang gyud sila,” ingon ni SMS lady spikers coach Ren-ren Abut.
Naghinamhinam sab ang ALC sa ilang umaabot nga dula diin ilang gihagit ilang kaugalingon batok sa SMS.
Unom sa mga kusog nga mangdulaay sa ALC gikan sa Pilgrim Christian Highschool sa niaging tuig ang susi ni coach Bobong Ramire sa umaabot nga semifinals.
“Lingin ang bola pero naka-mind set na kami ana,” ingon ni Ramire, nga matod niya gikan na sila na-expose sa pipila ka invitational ug open nga torneyo.
Gibulgar sab ni Ramire nga modula iyang team sa Pangantucan, Bukidnon Invitational Tournament human sa quarterfinals batok sa Misamis Oriental General Comprehensive Highschool.
Daug ang ALC, 25-18, 25-20.
Sa pikas nga semifinal nga dula, mag-atbang sab ang mas eksperyensyado nga Xavier University High School (XHUS) ni coach Angeliz Velez-Anoos batok sa Mercy Child Academy.
Natagak natagak sa XUHS Volleybelles ang Oro Christian Grace School, 25-9, 25-12, sa quarterfinals, samtang ang Mercy Child nidaog kontra Bulua National Highschool, 25-17, 25-19.