HUMAN maapektahi ang serbisyo nga gipahinungod sa gobernadora nga si Gwendolyn Garcia sa kalungsuran kay daw susama naman sa kabugnaw sa simud sa itoy ang paghangop kaniya sa katawhan tungod sa padayon og way puas nga paghilo sa kahanginan sa mga estasyon sa radyo kansang mga komentarista ang nagpunay sa pagtuki sa matud pa “recycled issues”.
Hingpit nga nakadesisyun sila si Atty. Rory Jon Sepulveda, tigpamababa sa Gobernadora nga panahon na nga masupil kining maong walay sukaranan nga mga pagpanamastamas og gikinahanglang mosukol na ang dinaugdaug.
Ilang gipahibawo nga bisan og anaa na ang kaso sa Cebu International Convention Center sa buhatan sa Ombudsman, tuyo gyud nga banhawon sa matag adlaw kining maong bahaw nga isyu sa kahanginan og kini nagpakita lamang sa malisya og dautang tuyo sa pagpakauwaw sa kasamtangang nangatungdanan.
Busa, kining lima nga mga sabaan sa radyo gipahimangnuan nga inihap nalang ang ilang mga adlaw sa pagpangabuso kay karon gi-monitor na sa Kapitolyo ang ilang mga tulumanon unya tun-an kini sa ilang mga lantip og bar topnotchers nga mga abogado aron ang tukmang lakang ikapasaka dayon batok ning mga mapalabi-labihon og iresponsableng mga sakop sa media dinhi sa Sugbo.
Nganong ipaagi pa man sa hulga kining ilang lakang? Humana man nahimo og nabatbat sa kahanginan ang komentaryo, kon dunay valid cause of action, dili na angayang ihata-hata pa ang kaso.
Kining maong estratehiya naghatag lamang og hulagway sa usa ka matang sa administrasyon nga dili gustong singilon ug pangutan-on sa mga Sugbuanon.
UPDATE KONTRA RECYCLED?
Sa ekslusibo natong pakighinabi kang Assistant Ombudsman Virginia Palanca Santiago iyang gitin-aw nga sa makanunayong pagsamok-samok kaniya sa atong sibyaanan, bugtong update lamang sa mga kaso ang atong gipangayo.
Kay kita mismo sayod man usab sa limitasyon sa atong pagpanibya ug kita nirespeto sa katungod sa Ombudsman sa paghimo sa ilang katungdanan sa pagdala sa kaso pinasubay sa lagda sa ebidensya.
Isip usa ka magsisibya, among obligasyon ug katungdanan ang pagpadangat sa kamatuuran ngadto sa katawhan bisan pa man ug tungod ning maong binuhatan, kami makapalipay o makapasakit sa mga hingtungdan.
Ubos sa Section 1, Article 11 sa 1987 Constitution, klaro og dayag ang provision nga: “Public Office is a Public Trust”.
Kon walay gitaguan ang Kapitolyo sa katawhan nganong ikasuko man ang pagpangayo og update sa mga kasong ilang gi-atubang nga gikinahanglan pang mosangko ngadto sa pagpanghulga.Tungod kay ang atong panggobyerno usa man ka demokrasya ug dili monarkiya, komunista o diktadorya, angayang atubangon sa mga hingtungdanan ang ilang obligasyon sa transparency ug accountability ngadto sa katawhan.
(ikeiidurano@ymail..com)