NAUNSA man intawon ning taga Kapitolyo mora man og gitil-asan kon hisgutan sa media ang ilang mga kuwestiyonableng transaksiyon. Tiaw ba nimo kanang gi-monitor kuno ang pipila ka mga sakop sa media nga kritikal sa administrasyon ni Gov. Gwen Garcia labi pa kanang magsigi og hisgot anang overpricing ug anomaliya sa Cebu International Convention Center (CICC).

Matod pa ni Capitol Consultant Abogado Rory Jon Sepulveda nga ilang gi-monitor karon ang pipila ka sakop sa media labi pa ang mga komentarista nga kanunay nagbalik-balik sa isyo sa CICC ug posibleng ilang himoan og lakang. Ilang i-reklamo ngadto sa Citizens Press Council, sa mga editors ug station managers o ba kaha ngadto sa Kapisanan ng mga Brodkaster ng Pilipinas (KBP).

For updates from around the country, follow Sun.Star on Twitter

PAGPANGHULGA

Unsa man kining gihimo sa taga Kapitolyo, pagpanghudlat ug pagpanghulga aron mohilom ang media? Sobra pa man sa diktador ning ilang gihimo. Unsa may buot nilang ipasabot nga langkatan nila og kagawasan ang prensa aron dili na motuki sa mga negatibong isyo batok sa Kapitolyo? Sobra pa man ning ilang sa diktatoryang pangagamhanan ni Marcos.

Dili na unta kini angayan nilang himoon. Ila na lang i-deretso og kiha ang si bisan kinsang media nga nagyama-yama sa Kapitolyo. Kon ang komentaryo sa usa ka sakop sa media nakaguba o nakabuong sa imahin sa Kapitolyo labi pa sa gobernadora, aw, ila nang ikiha. Dili kay ipaagi pa og pagpanghulga. Unsa man nagtuo kaha sila nga mahudlat o mahadlok usab ang media?

KAGAWASAN

Kitang tanan adunay kagawasan sa pagpadayag kon unsa man ang atong mga huna-huna ug panahom sa usa ka isyo. Kanang pamasangil lahi na. Mao nga puwedeng mapsanginlan ang usa ka tawo og kasong libelo gumikan niana. Nganong dili man lang mohimo og legal action ang Kapitolyo? Kay sa ilang pahilumon ang taga media.

Nakatambong ako sa presentasyon ni Gov. Garcia kabahin pagtukod sa CICC niadtong miaging tuig uban nila ni KBP Chairman Carlo Duga-Duga, Leo Lastimosa, Atty. Ruphil Banoc ug Choy Torralba.

Apan technical kaayo ang presentation ug lisud kaayong sabton.

Pero ako mismo wala makombensir sa maong presentasyon ni Gwen ug anaa gihapon ang pagduda nga gipaburot ang maong edipisyo.

Apan kinsa ba akong mohusgar niini nga wala man kitay kabangga-agan pagtukod og building. Mao nga maghuwat kita sa findings sa Ombudsman.

Apan unsa ba usab nga nilikoy man kalit si Deputy Ombudsman Pelagio (Pila-iyo) Apostol. Gusto man hinoong i-absuwleto si Gwen.

(bgnalzaro@gmanetwork.com)