ANG pagpadayag ni Capitol Consultant Rorejohn Sepulveda nga posibleng ilang pasakaan og kaso ang pipila ka mga media nga nagsigi og tuki sa kontrobersiyal nga Cebu International Convention Center (CICC) naghatag og laing kahulugan.
Si bisan kinsa kanato makakiha ni bisan kinsa kon kita nagtuo nga adunay saktong kapasikaran.
Ang pagsigi og hisgut-hisgut sa CICC dili maoy igong basihan nga makakiha ang Kapitolyo ngadto sa pipila ka mga media.
Ila una kining tukion kon kini libelous ba o aduna bay malice nga gipangbuhiang pulong ang mga giingong media.
Apan dili kapugong ang Kapitolyo kon ang isyu sa CICC pabileng maoy sumsuman sa mga media tungod kay wa pa man makapagawas og hukom ang buhatan sa Ombudsman kinsa padayon pa karong miimbestigar aron matino kon aduna ba gyuy nahitabong overpricing sa pagpatukod niini.
Pagpanghulga aron mohunong sa pagkomentaryo ang mga media kalabot sa CICC maoy posibling tumong ug tuyo ni Sepulveda.
Nganong iya pa mang ipahibawo sa kadaghanan nga makakiha man sila bisan og way bahadbahad?
Ang gibuhat ni Sepulveda mao na hinuoy nakahagit sa pipila ka mga komentarista.
Nakapasamot na hinuon sa intriga ug naghatag pa gyud ug dugang pagduda.