HINGPIT nang nakalingkawas ang mga opisyal sa Association of Barangay Councils (ABC) sa dakbayan sa Sugbo sa kasong ilang giatubang nga gipasaka batok kanila sa kanhi empleyado sa ilang buhatan niadtong 2002 nga ilang gitaktak.

Kagahapon sa buntag gipakanaog sa Sandiganbayan 4th Division didto sa Manila ang hukom nga way sala ang mga opisyal sa ABC nga gipangulohan ni ABC President Eugenio Faelnar sa ilang pagtangtang kang Engr. Leah Rondez.

For updates from around the country, follow Sun.Star on Twitter

Si Pahina Central Barangay Kapitan Sisinio Andales nipahibawo sa Sun.Star Superbalita nga silang gipasakaag kaso ni Rondez pulos na-acquitted sa kaso “kay way basehanan ang iyang (Rondez) kiha.”

“Ang iyang (Rondez) ebidensya di lig-on nga makakombikto namo,” saysay ni Andales human nadungog nila ang hukom nga gipakanaog nilang Justices Gregory Ong, Jose Hernandez ug Roland Jurado.

Ang opisyal nitumbok nga way basehanan ang pasangil ni Rondez kanila kay di gyod kini angay nga hatagag refund kay nasuta nilang wa motakdo ang mga dokumento nga iyang gipresentar.

Gawas niini, ilang gikwestyon nganong sa ilang administrasyon nangayog refund si Rondez nga pwede man unta ni niya buhaton dihang si kanhi ABC President Jose Navarro pa ang nangulo sa buhatan.

Nasayran nga si Rondez nikiha sa mga opisyal sa ABC tungod sa ilang kapakyas sa paghatag kaniyag refund sa nagasto niya sa gasolina ug paghatag kaniyag terminal leave benefits.

Ang Office of the Ombudsman nihatag og gibug-aton sa pasangil ni Rondez hinungdan nga gipasakahan silag kasong administratiba ug kreminal.

Una silang nakalingkawas sa kasong administratiba kay gibasura kini sa korte.

Gisuspenso sila si Faelnar ug kaubanan unya girekomendar silang tagsa-tagsang mopiyansa og P30,000 alang sa ilang temporaryong kagawasan samtang gihusay sa korte ang kaso.

Gawas nilang Faelnar ug Andales, ang ubang nag-atubang og kaso mao sila Daido Abcede Sr., Fortunato Parawan, Lorenzo Basamot, Michael Ocleasa Sr., Michael Ralota, Nemesio Pagador Jr., Licerio Jaca, Nilo Tariman ug Jerry Guardo.

Silang Faelnar, Andales ug Ralota nalang ang nagpabiling mga opisyal sa ABC karon. Di na mga kapitan silang Abcede, Parawan, Ocleasa, Pagador ug Tariman unya namatay na si Jaca.

Sa iyang bahin, si Andales namahayag nga wa na siyay interes nga mosumbalik og pasakag kaso batok kang Rondez bisan pa man nga nakagasto siyag dakong salapi aron depensahan ning ilang kaso.