DEAD on arrival sa tambalanan ang usa ka motorista human mabangga sa laing motorsiklo sa Barangay Pit-os, Siyudad sa Sugbo.
Si Police Corporal Dante Mahilum sa Talamban Police Station niila sa namatay nga si John Rey Suarez, 38, taga Sityo Tuburan, Barangay Pulangbato, Siyudad sa Sugbo.
Samtang ang drayber sa laing motor nga naengkwentro ni Suarez nailhan nga si Robert James Erana, 28, taga Barangay Tingub, Dakbayan sa Mandaue.
Sa imbestigasyon sa Talamban Police Station nasayran nga sila si Suarez ug Erana nagsubay sa samang dan apan managlahi og destinasyon.
Dugang ni Mahilum nga si Suarez paingon na unta mopauli samtang si Erana paingon usab sa Barangay Binaliw, sikbit sa Barangay sa Pit-os.
Si Suarez nadala pa sa tambalanan, apan gideklarar nga patay na sa pag-abot samtang si Erana angol ug anaa usab sa ospital. / BBT