GIPUSIL patay ang usa ka 68-anyos nga lolo samtang naglingkod-lingkod daplin sa dalan sa Pleasant Homes subdivision, brgy. Punta Princesa, dakbayan sa Sugbo.

Naglibog pa bisan ang pamilya sa biktimang si Silverio Bardago, 68, caretaker sa bakanteng lote sa dapit kon nganong siya gipusil lalakeng nagmotorsiklo.

For updates from around the country, follow Sun.Star on Twitter

Ang biktima nga samdan sa iyang tuo nga tampihak namatay diha-diha.

Sa pasiuna nga imbestigasyon nga gihimo nila ni SPO3 Rey Cuyos, PO2 Julius Mabunay, PO2 Michael Cudaste ug PO1 Aventurado sa Homicide Section nagbutyag nga diha sa gawas sa iyang barong-barong ang biktima naglingkodlingkod.

Wa magdugay niabot ang usa ka tawo nga nagmotorsiklo.

Nibunot kini og armas dayon gipusil makausa ang biktima tumong sa ulo.

Diretsong nahagba ang biktima.

Niadtong higayona, nakasaksi ang iyang anak nga si Renato nga diha usab sud sa ilang balay nga pipila lang ka metros ang gilay-on gikan sa gipuy-an sa iyang amahan.

Wa na makalihok ang anak, apan nisulod sa ilang balay tungod sa kabalaka nga siya ang isunod.

Pagsibat sa suspek, si Renato nigawas ug nangayo og pakitabang sa mga silingan.

Si Cuyos, sa iyang bahin, niingon nga ila pang himuon ang dugang imbestigasyon tungod sa ilang kahibulong nganong gipatay ang biktima.

Nitumaw ang pagduda nga posibling ang anak maoy target ug naalaan lang ang biktima kay ngitngit ang dapit nga iyang gilingkoran.