KON dunay politiko nga dimalason aduna say suwertihunon. Sama ni Davao Oriental governor Corazon Malayaon, Compostela Valley governor Arthur Chiongkie Uy ug Davao del Norte governor Rodolfo del Rosario nga pulos walay mga kalaban karong umaabot nga eleksiyon sa 2010.
Hinuon sa ilang tulo si Governor Uy lamang ang nakatilaw og kapildihan sa pagsugod niya sa politika niadtong eleksiyon sa tuig 2001. Apan si Governor Malanyaon sa iyang kasaysayan sa pamolitika gikan dinhi sa siyudad sa Davao nga nahimong numero unong konsehal sa 3rd district, hangtud na ngadto sa Davao Oriental wala gyud makatilaw og kapildihan.
Sama sa rekord usab ni Governor del Rosario sa probinsiya sa Davao del Norte. Sukad sa pagsugod sa iyang politikal career niadtong tuig 1978 hangtud karon wala makasinati og kapildihan. Pagkasuwerte niining mga tawhana. Mangutana lang ta, unsa may inyong mga sekreto? Ah, tingali dili mga plastik ug matinud-anon sa serbisyo mao nga sa politika way pildi-pildi ug gimahal sa mga tawo.
Governor Generoso
Sa lungsod sa Governor Generoso kun Sigaboy, ang lungsod diin didto kita nagagikan, "one-on-one" ang away sa politika didto. Sama sa naandan wala na'y laing mikalaban kang incumbent Mayor Vicente "Inting" Orencia mao si kanhi mayor Gerry dela Serna. Ang problema lang kang dela Serna kay maut og rekord sa duha niya ka termino nga nahimong mayor sa lungsod sa Sigaboy.
Kanunay wala sa munisipyo, ka-usa ra molingkod sa iyang opisina sulod sa usa ka semana. Maglurat ang mga mata sa tawo og paabot kon dunay tuyo sa mayor. Kon dunay mga papeles nga pirmahan ipadala lang sa iyang gi-arkilahan nga balay ug didto pirmahan.
Niadtong bulan sa Septyembre hangtud sa bulan sa Nobyembre tuig 2006, gisuspende sa Ombudsman tungod kay dunay kaso sa iyang pagpangatungdanan. Tingali mas maayo pang mobalik na lang si dela Serna sa pagka-pari kay mora'g wala siyay luna sa public service.
Alang kang incumbent Mayor Orencia, kababayan, pagpakita pod og milagro kay nakatapos ka na og tulo ka termino nga siyam ka tuig. Karon nakatapos na sad ka'g tulo ka tuig sa imong ikaduhang pagbalik, pagmilagro pod kay wa man ta'y nakitang kabag-ohan sa atong lungsod, mayor? Ngano man lagi si Mayor Marcelino Ferandos sa lungsod sa Carmen, Davao del Norte nga sulod lang sa usa ka termino nga nahimo siyang mayor sa maong lungsod mora man og kilat ang development sa iyang lungsod. Matud niya diskarte lang daw sa PR ang gikinahanglan kon gusto kang mouswag ang imong lungsod.
So, Mayor Orencia, sir, wake up para kon mohawa ka na isip mayor sa atong lungsod duna kay legacy nga ikabilin sa atong lungsod. Kay karon nga mokabat sa 12 ka tuig kang nahimong mayor wa gyud ta'y nakita nga kausaban.
Paminawa ang "KONTRA BALANSE" sa radyo DXKT, 1071 sa dial sa inyong mga radyo, alas 6 hangtud sa alas 7 sa buntag, Lunes hangtud sa Sabado. Tan-awa usab ang "KONEKSYON" sa RPN, solar TV channel 9, kada Biyernes, alas 7 hangtud sa alas 8 sa buntag.