NANGAPASLOT tungod sa grabeng paso ang lawas sa napulo ka mga sundalo human misilaob ang ilang gisakyang military truck sa probinsiya sa Maguindanao.
Base sa taho gikan sa Maguindanao Police Provincial Office, mga alas 2:50 sa hapon, Enero 6 nahitabo ang insidente.
Sakay ang mga sakop sa 46th Infantry Battalion sa Philippine Army sa usa ka Isuzu elf gikan sa ilang kampo paingon sa Headquarter sa 6th Infantry (Kampilan) Division sa Philippine Army.
Apan pag-abot nila sa barangay Bagan, Guindulungan, kalit lamang midilaab ang makina sa ilang sakyanan dungan sa pagbuto sa tangke sa gasolina.
Ang napulo ka mga sundalo nga nangapaso, nakaangkon ug 2nd degree burn sa nagkadaiyang parte sa ilang lawas samtang duha ka m14 ug usa ka m16 armalite rifles ang naugdaw sa kalayo.
Matud ni Hammil Tarad, nakakita sa hitabo, kusog kaayo ang dagan sa sakyanan sa mga sundalo dihang kalit lamang kining midilaab ug duna siya'y nadungog nga pagbuto hinungdan nga nangambak ang mga sakop sa 46th Infabtry Battalion.
Dunay mikatag nga balita nga gipabuthan og stock mortar sa mga rebelde ang trak apan gipanghimakak kini ni 6th ID Spokesman Colonel Jonathan Ponce.
Iyang giklaro nga nadisgrasya ang gisakyan sa 46th IB hinungdan napulo ka sundalo ang naangol.
Gidugang ni Ponce nga luwas na ang mga biktima ug nagpabiling giatiman sulod sa Camp Siongco Hospital.
Apan mga sibilyan nagsulti nga una natumba ang gisakyan sa mga sundalo, gilamoy na sa kalayo ang makina niini.
Ang kapulisan sa Guindulungan, padayong mihimo sa imbestigasyon aron gyud masuta kong unsa ang hinungdan sa maong hitabo.(Edgardo Fuerzas)