Lalaki nga wanted giposasan

USA ka lalaking wanted sa kasong child abuse ang nasikop sa mga sakop sa kapulisan didto sa lungsod sa Mawab, Compostela Valley Province.

Ang dinakpan nailhan nga mao si Alexander Burlat "alyas Zander", 24, ug molupyo sa Purok 10, Barangay Andili, sa maong lungsod.

Sumala sa report gikan sa Mawab Municipal Police Station nga pasado alas 10:00 sa buntag niadtong Martes nasikop ang suspek sa mga otoridad pinasubay sa gahum sa warrant of arrest nga giisyu ni Judge Hilarion Clapiz sa Regional Trail Court 11th sa lungsod sa Nabunturan tungod sa kasong paglapas sa Republic Act 7610 kon Anti- Child Abuse Law.

Ang suspek nasikop nila ni Police Officer 2 Ricohermoso ug Police Officer 1 Etablanco sa Mawab Municipal Police Station didto sa dapit.

Ang warrant of arrest gipagula sa korte niadto pang Mayo 13, 2009.

Ang suspek gitanggong dayon sulod sa selda samtang P80 mil ang girekomendang piyansa sa korte alang sa temporaryong kagawasan niini.

Samtang sa laing bahin, usa sab ka lalaking dunay pending nga warrant of arrest ang mitahan sa buhatan sa kapulisan didto sa dakbayan sa Panabo.

Ang misurender mao si Danilo Villa Abrille, 33, ug molupyo sa Purok Lumboy, Barangay Gredu, siyudad sa Panabo.

Matud sa report nga pasado alas 8:45 sa hapon niadtong Miyerkules, mitahan sa iyang kaugalingong ngadto sa buhatan sa kapulisan ang suspek.

Ang suspek gikataho nga dunay pending nga warrant of arrest sa kasong qualified theft nga nakadukit sa criminal case number 7411.

Ang warrant of arrest gipagula ni Judge Andrea Asistido dela Cruz sa Municipal Circuit Trial Court in Cities sa dakbayan sa Panabo.

Wa na mihulat pa ang suspek nga dakpon siya sa mga otoridad ug boluntaryo nga miampo.

Temporaryong gitanggong na sulod sa selda ang suspek samtang nagpaabot sa mando sa korte. (Marvin Pineda)