3 anyos nasunog

USA ka tres anyos nga batang lalaki ang napagod sa kalayo samtang napaso sab ang iyang apohang babaye human misilaob ang ilang balay sa alas 12:05 sa hapon niadtong Miyerkules.

Namatay mao si Neil John Adam samtang nakaangkon og grabeng mga paso sa kalawasan ang apohan niining si Susan Singson Pepito, 51, pulos nagpuyo s Purok Mauswagon, Barangay Megkawayan, distrito sa Calinan, siyudad sa Davao.

Ang spot report sa kapulisan sa Calinan Police Station nagbutyag nga nanglaba sa ilang mga senena ang apohan sa bata ug gibilin nga nag-inusara sa ilang balay si Neil John.

Si Pepito nagbutyag sa kapulisan nga pipila ka minuto sa iyang paghiabot sa dapit diin siya nanglaba, iyang nakita nga miaso ang ilang balay.

Samtang miaso ang balay, suma ni Pepito, iyang nadungog ang iyang apo nga nangayo og panabang mao nga midagan siya paingon sa balay aron palungon ang kalayo.

Si Pepito nagbutyag nga tungod sa kadako sa kalayo, wala na niya mahimo ang pagpalong niini apan nakahukom siya nga mosulod sa balay aron luwason ang bata mao nga napaso siya.

Maayong pagkapagod sa lawas sa bata dihang giugkat sa mga sakop sa Bureau of Fire Protection nga miresponde sa sunog.

Ang gilay-on sa gilabhan sa apohan sa bata gikan sa ilang balay, suma sa report, mga 50 metros hinungdan nga wala makita kung unsa ang gihimo sa bata.

Dunay silingan sa pamilyang Pepito nagbutyag nga nagdula og lighter ang bata sa dihang nag-inusara sa ilang balay.

Gidudahan nga gipasiga sa bata ang lighter ug giduslitan ang mga butang nga daling masunog mao nga misilaob ang ilang balay nga mokabat sa P150,000.00 ang danyos niini.

Samtang giandam sa kabanay sa bata ang iyang lubnganan, giatiman sab karon ang apohan sa mga doktor sa Mindanao Burn Center sulod sa Davao Medical Center (DMC). (AD)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph