ANG Barangay Luz gi-lockdown ni Mayor Edgardo Labella tungod sa kataas na sa mga kaso sa coronavirus disease (Covid-19) sa sityo Zapatera. Dul-an na kini og 200. Ang kinabag-an sa mga kaso sa Dakbayan sa Sugbo, naa diha sa mao nga dapit.
Nagsugod lang ang kaso sa usa ka lumolupyo, kinsa nakatakod sa iyang usa ka kabanay ug laing suod nga higala.
Nihangyo ang barangay officials sa Siyudad, pinangulohan ni Barangay Kapitan Ronilio Sab-a, nga i-quarantine sa lahi nga lugar ang duha nga naa lang sa sityo gi-home quarantine. Nilihok na unta ang Siyudad apan ang Department of Health (DOH) dunay giingong protocol nga ang asymptomatic kun way simtomas sa sakit, anha lang sa balay i-quarantine.
Kani nga protocol maayo lang sa mga dapit nga lagyo ang balay, sama sa mga subdivision, di sama sa sityo Zapatera nga sikit ang mga balay. Naay mga balay nga nag-abot ang mga pultahan sa entrance ug exit. Naay mga bungbong nga nag-abot ug bentana.
Ang nakapait kay ang naa sa sud sa balay dako kaayog kahigayunan nga makatakod kay maora lang og sama sa balay sa pati ang kadaku. Way kapuslanan ang home quarantine kay nagsinardinas ang mga nagpuyo.
Tuod man, mikalit lang og sulbong ang gidaghanon sa mga tawo nga positibo sa Covid sa mao nga sityo. Dunay usa ka hugna nga niabot og 80 kapin ang positibo.
Unta, sa dihang nakompimar ang kaso sa usa, ug natakdan ang laing duha, diretso kining gi-isolate sa usa ka dapit, sama sa Barangay Luz National High School. Tingali, di na ingon niani kadaghan ang nangatakdan.
Nakomplikado pa ang problema kay dunay pipila ka lumolupyo ang way pakabana, nagsige lang og suroy, sama sa way nahitabo. Karon, kinsa kaha ang basulon, ang gobyerno nga hiwi og polisiya o ang mga lumolupyo nga gahig ulo?