NA-OSPITAL ang magtiayon human gisukmag niadtong Huwebes mga alas 8:00 sa gabii sa lungsod sa Opol, Misamis Oriental.

Giila ang magtiayon nga mao sila si Jimmy Capungan, 39, minyo ug asawang si Jiada, 44, sa susamang dapit.

Sa gihimong pakighinabi sa Sun.Star Superbalita sa usa sa silingan sa biktima kinsa nakamatikod sa kagubot ug nibisita sa balay tambalanan ngadto sa magtiayon.

Gisaysay niini nga away sa mga gagmayng bata ang gituohang hinungdan sa panaglalis sa maong mga silingan.

Nasayran nga nag-abang lamang og boarding house sa maong dapit ang magtiayon hinungdan nga dili pamilyar niini ang mga pangalan sa silingan.

Kalit lang nga nasuko ang amahan sa maong mga bata nga nakaaway sa mga anak ni Capungan hinungdan nga nagkalalis ug nisangpot ngadto sa pagpanukmag.

Nabun-og ang lain-laing parte sa lawas ni Jimmy labina ang wala nga parte sa mata, samtang na-black eye usab ang wala usab nga bahin sa mata ni Jiada.

Gipangdala ang mga biktima sa Northern Mindanao Medical Center (NMMC) ning siyudad sa Cagayan de Oro nga padayon pang giatiman sa mga doktor ning panahona.

Samtang ang kaso gisunod na sa kapolisan sa Opol Police Station aron pag-ila sa ngalan sa misukmag diin mga biktima desidido nga mopasaka og tukmang kaso batok sa suspetsado. (SVB)