ANG tinguha nga mahatagan og igong higayon nga mabuhi pagbalik ang megafight karong Marso 13 tali ni Manny Pacquiao ug Floyd Mayweather Jr. daw sa nitidlom na usab.
Kini maoy unod sa giluwatang pamahayag sa promoter ni Pacquiao nga si Bob Arum.
Ang taho nga napatik sa BoxingScene. Com nagkanayon nga ang mga representatives ni Pacquiao ug Mayweather wa makasinabot human sa duha ka adlaw nga panagtagbo atubangan ni retired federal judge Daniel Weinstein sa California.
Ang procedure sa drug-testing diin ang kampo ni Mayweather miinsister gyud sa pagpahigayon sa Olympic-style, random testing ubos sa US Anti-Doping Agency.
Samtang ang grupo usab ni Pacquiao gusto nga ang blood ug urine testing himoon sa gikatakdang petsa ug kini ubos sa Nevada State Athletic Commission.
Matod pa nga ang kampo ni Pacquiao misugot nga ang testing ipahigayon sa ika 24 ka adlaw sa di pa ang away ug dili na lang sa ika 30 ka adlaw sigon sa unang sugyot.
Apan wa mosugot ang habig ni Mayweather.
Tungod niini, ang duha posibling moaway sa Marso batok sa managlaing kontra.
Wa kapugong ug nadala sa emosyon, si Arum daling miisa sa tingog ug mipahibawo nga “the fight is off” atubangan sa magubot nga negusasyon.
“The mediator called me [before 8 p.m.] and told me the fight was off,” matod ni Arum. “The fight’s off, Mayweather never wanted it. Manny wanted the fight. He was agreeable to terms.”
Nasagmuyo sa maong kalambuan, gibutyag ni Arum nga iya karon hikayon ang laing away ni Pacquiao ug ning higayona batok sa bag-ong kampiyon nga si super-welterweight champion Yuri Foreman karong Marso nga maoy maghatag og kahigayonan sa Filipino boxing icon nga makaangkon sa iyang ikawalong world title fight sa managlaing division.
“I am disappointed in the sense this fight will not happen,” padayag ni Arum. “I’m not surprised. I always knew Mayweather would kill it because he didn’t want it. He didn’t want to lose.”