GIANGKON ni Commission on Elections (COMELEC) National Legal Director Ferdinand Rafanan sa Tulumanong Alagad sa DYRF Radyo Fuerza, 1215 Khz AM nga mikagar ang Precinct Count Optical Machines nga gideliver sa Smartmatic International sa dihang ilang gipahigayon ang testing niini sa gibutangang warehouse sa Cabuyao, Laguna.
Pinangulohan ni Comelec Commissioner Gregorio Larrazabal ilang gisangsang sa makina ang 600 ka mga balota apan 30 lamang niini ang gibasa samtang ang 570 gisuka. Kini tungod kay padayon pa kuno nilang gi-adjust ang settings kun templa nga ensakto sa maong mga makina. Kay tungod sa ka-sensitive niini, ang mga baga kaayo nga pagka-shade ang iluwa ug dili niini basahon.
Dinhi mitumaw ang kabalaka sa katawhan, un-saon na man lang ang imong balota kon sa pipila ka mga posisyon nga gipilian nasubraan sa pagduot ang lapis sa pagbadlis sa napiling kandidato.
Kini hilabi na kay ang kinabag-an sa mga bo-tanteng Pilipino gikan sa sector sa masa nga wala maanad sa pagkupot og lapis o ballpen sa opisina ug ang sagad nga kuptan mao ang pisi sa kabaw, daro o guna.
Tungod usab sa kadaghan sa mga posisyon nga kinahanglang pagapilian, mitumaw ang mga pangutana nga kon dili nimo kumpletuhon pag shade ang tanan, o ba kaha molapas og usa sa gipiliang 12 ka senador, o konsehales, ma-invalido na ba ang imong balota? Kini pipila lamang sa mga lehitimong basehanan sa katawhan ning bag-ong sistema sa piniliay nga karon pa lamang ipatuman aron sa paghatag og katumanan sa gidamgo nga limpyo, paspas ug katuohang resulta sa elek-syon.
Sa iyang bahin si Director Rafanan mipasalig nga ilang gihimo sa pagkakaron ang dinalian nga pagsuta sa mga buslot aron sarang kahatagan og solusyon sa dili pa ang eleksyon. Ang nakaporke lang kay ning ilang pagpanapak og buslot, apil nga nakapusta ang kaugmaon sa demokrasya ning atong nasod ug ang ila unyang kapalpakan dili mamahimong sa “Im Sorry” pagahugasan, kay kini makapahitumpawak sa atong katawhan ngadto sa laing kaalautan.
ILOG SA KALSADA
Nagpalaban si Mayor Jonas Cortes sa buhatan sa Visayas Ombudsman ning ilang altrukis ni Kongresista Nerissa Soon Ruiz kon si kinsay mopaayo ug mopasemento sa 50 metros nga JP Colina Street diha sa dakbayan sa Mandaue. Gani gikinahanglan pang iyang ideploy ang mga sakop sa Swat aron lang kaprotihian ang niya pa government property nga gustong panamastamasan sa iyang kaatbang nga moresulta sa pagkausik sa kwarta sa katawhan.
Nganong misul-ob man intawon sa antepara sa kabayo sa Duljo kining atong mayor sa Mandaue? Sa kadaghang gubaon ug busloton nga kalsada hilabi na kanang diha sa Canduman, Tipolo, Hernan Cortes ug uban pa. Mas maayo tingaling adto na lang na ihapak kanang maong mga aspalto ug semento, inay mag-ilog sa pagpasikat nianang gamay kaayo nga proyekto.
(ikeiidurano@ymail.com)