DAGHAN ang nag-ingon nga bati ang subrang pamulitika. Pero usahay aduna bayay kaayuhan nga makuha ang publiko gumikan sa init nga panagtigi sa pulitika. Ang taga south district sa dakbayan sa Sugbo nakabenipisyo gumikan sa init nga panagribal nila ni Mayor Tomas Osmena ug negusyanteng si Jonathan Guardo, kinsa pulos magpapili pagkakongresista sa maong distrito.
Nag-ilog sila si Tomas ug Atan kon si kinsa ang mo-areglo sa minatay human madat-ugi og pader. Nag-ilog kabahin sa basketball goal ug nag-away kabahin sa kampaniya sa dengue. Napugos og hatag og umento si Tomas og benipisyo alang sa mga senior citizens gikan sa dos mil ngadto sa 4 mil ka pesos matag tuig.
Kon wala pa mangambisyon si Tomas pagkakongresista dili unta mohatag ning maong kantidad sa mga senior citizen.
MANDAUE CITY
Sama niining nahitabo usab karon sa dakbayan sa Mandaue. Nagkainit ang panagsakbang nila ni Mayor Jonas Cortes ug Congresswoman Nerrisa Soon Ruiz, kinsa magpapili usab pagkamayor. Tiaw ba nimo kanang gamay kaayong dalan diha sa Barangay Estancia, giilugan nila kon kinsay mo-ayum-ayom.
Si Mayor Cortes nangangkon nga ila nang gisugdan ang maong proyekto nga pagpasemento sa 80 metros nga dalan ug drainage.
Apan giilog, matod pa, ni Inday Nerry. Apan ang kongresista nagkanayon nga dugay nang gitrabaho ang maong dalan apan wala mahuman gumikan kay walay igong pundo ang city government. Mao nga iyang gigahinan sa iyang pork barrel aron maayo. Pastilan no, pagkagamay ra nianang maong proyekto apan gi-ilugan. Pulitika lang gihapon ang hinungdan. Naay A.S Fortuna nga taga bugan ang tubig kon magbaha, wala gayuy nag-ilog kon unsaon na pagsulbad. Hinuon, motumaw ra man nang maong problema kon mag-uwan. Kon way uwan, wa may problema. Mao sab ni nakanindot sa pulitika, makabenipisyo ang katawhan.
ELEKSIYON
Daghan ang mireklamo nga taga Mandaue gumikan kay ang karsada sa ilang lugar wala ma-atiman. Diha sa barangay Tawason, puwerting gubaa, unya walay nag-ilog. Nganong wala man kuno ma-areglo ni Mayor Cortes. Ipaayo ninyo ni Inday Nerry aron mo-aksiyon usab si Mayor Cortes.
Inig-abot sa eleksiyon mas mabulahan ang katawhan kay mamalit man kinig boto ang mga pulitiko. Unya daghang saad nga inighuman sa eleksiyon di na makahinumdom sa ilang mga saad. Mas maayo ning init nga pulitika kay makabenipisyo ug mabulahan ang katawhan. Sige away pa mo.