SA kadaghan sa mga karsada nga guba sa Mandaue city, ang mubo kaayong R. Colina st. maoy giilugan sa duha ka mga opisyal.

Hapit pa gyud maggamitay sa kusog ang tagsa ka mga sinaligan nila ni Mayor Jonas Cortes ug Kong. Nerissa Soon-Ruiz.

For updates from around the country, follow Sun.Star on Twitter

Di lang kay ang mao nga karsada maoy guba ug ayuhunon.

Gawas gani sa guba nga karsada, duna say mga dapit nga daling bahaan bisan gamay lang ang uwan.

Naa pay ubang mga dapit nga maora gyud og swimming pool kon sanapan sa tubig.

Ang uban sab nindot duwaan og sungka kay maorag sungkaan tungod sa kadaghang mga libaong.

Taudtaod nang nangreklamo ang mga tawo sa mao nga dapit sa baha.

Unta higayon na kini nga ang ilang mga mulo matubag na human malangay ang proyekto.

Apan seguradong mosamot na nig kalangay kay nag-away na man ang duha ka mga opisyal.

Kana kon moinsister gyud ang mayor nga hunungon ang proyekto.

Nahuna-huna ba kaha ni Cortes nga ang iyang pagbadlong sa di pagpadayon sa proyekto mas makadaot inay makaayo kaniya?

Ang nakapuntos ini karon mao si Ruiz.

Ning panahon sa eleksyon, makatibhang kini sa puntos sa mayor.

Luoy sab ang mga tawo sa dapit nga nahikawan sa serbisyo sa away sa mga pulitiko.