GAWAS sa pagduaw sa Basilica del Sto. Nino aron makita ang orihinal nga imahe sa milagrusong bata, usa sa mga bisitahon usab sa mga deboto mao ang museum.

Naa kini mahimutang sa basement sa pilgrim center diin naka-display ang mga imahe sa Sto. Nino, nga nagkadaiya ang gidak-on, kolor ug posisyon.

For updates from around the country, follow Sun.Star on Twitter

Naglakip kini sa dancing Sto. Nino, Sto. Nino Perdido, ang nawala nga batang Nino nga nakita sa templo, ug mga replica sa orihinal nga imahe nga maoy gigamit atol sa tradisyonal nga hubo.

Apan matod ni Kenneth Lariosa, usa ka deboto nga nag-volunteer sa museum, nga usa sa rason sa pagduaw sa mga tawo sa museum aron makita ang mga antigong gamit sa Basilica ilabina na ang mga karaang vestment sa orihinal nga Sto. Nino ingon man sa mga paring Agustino.

Naa pa sa 16th century ang labing karaang vestment nga usa sa gi-display sa museum.

Gani tungod sa kakaraan, ang puwa nga vestment sa senior, nag-kolor off-white na.

Naka-display usab ang mga antigong gamit sa Basilica.

Usa ka glass showcase ang gibutangan usab sa mga alahas gikan sa mga singsing, bracelet, kuwentas ug relo nga giingong mga halad gikan sa mga deboto.

Laing glass showcase ang gitagana sa nagkadaiyang mga duwa nga gihalad sa mga bata ug mga ginikanan isip pasalamat nga naayo ang ilang mga anak sa sakit.

Sanglit duna say mga langyaw nga moduaw sa museum, duha ka mga frame nga puno sa mga kuwarta gikan sa lainlaing mga nasod ang naka-display usab.

Tungod sa ka-antigo sa mga naka-display ug ubang mga mahalong gamit, gibawal sa museum ang pagkuha og hulagway. (CPL)