GIHATAGAN og gibug-aton sa kapulisan ang anggulong love triangle nga hinungdan sa pagbanhig sa giila nga political leader ni Lapu-Lapu City Councilor Junard “Ahong” Chan nga si Allan Berame.

Ang hepe sa Lapu-Lapu City Police Office PSSupt. Mariano Natuel Jr. niingon nga anaa sa 80 ngadto sa 90 porsento nga love triangle ang motibo sa maong krimen.

For updates from around the country, follow Sun.Star on Twitter

Sukwahi kini sa pasangil ni Chan nga politically-related ang nahitabo sa ilang supporter niadtong hapon sa Disyembre 31, diin sila si Berame ug ang negusyanteng si Amit gi-ambush sa duha ka mga lalakeng nagmotorsiklo.

“We already received information that the assailant is a gun-for-hire from Surigao,” matod ni Natuel.

Aduna na usay impormasyon ang kapulisan nga dunay babaye nga gikalambigit sa biktima ug nga hayan nalambigit base sa mga pamahayag sa nakaila niini.

Di pa nila ikabutyag ang ngan sa babaye samtang nagpadayon pa ang imbestigasyon.

Gitumbok sab ni Natuel ang mga rason ngano nga way labot ang pulitika sumala sa resulta sa imbestigasyon.

Una, wa magpapili alang sa elective post ang namatay ug wa usab kini mangampanya sa usa ka political party.

Ikaduha, base sa certification gikan sa City Hall nga usa ka job order nga kawani si Berame isip utility worker gikan sa January 2007 ngadto na sa Disyember 2009.

Namatikdan usab niya nga di kinaiya  o batasan sa mga Oponganon nga mga politiko mopatay tungod lang sa pulitika gawas kon dunay dumot adunay dakong posibilidad sa pagpanimawos.

Samtang si City Atty. Joseph Lim nipamatuod nga wa mo-resign sa iyang katungdanan si Berame diha sa City Hall sanglit wa silay nadawat nga resignation letter.

Gitapos lang niini ang iyang kontrata niadtong Disyembre 31 nga mao usab ang adlaw nga siya gipatay. (FVQ)