DUHA ka mga tawo nga gituohang mga sakop sa usa ka fraternity gipamusil kagahapon sa pasado alas 3 sa kaadlawon sa may dan Katipunan, brgy. Labangon, dakbayan sa Sugbo.

Panagbangi sa duha ka managkaribal nga mga fraternity ang gidudahang hinungdan sa pagpamusil.

For updates from around the country, follow Sun.Star on Twitter

Mga biktima giila sa kapulisan nga sila si Jeremy Vincent Magtagad, 19, taga dan Salvador ug ang iyang higalang si Roselyn Dumaog, 23.

Si Magtagad naigo sa dughan hinungdan sa iyang kamatayon samtang si Dumaog nakaangkon og samad sa walang bukton ug tuong tiil.

Silang duha gipangdala sa Cebu City Medical Center (CCMC).

Matod ni SPO2 Rogelio Cañete sa Punta Princesa police station, kinsa usa sa mga ningresponde sa alarma, nga gikan namalit og beer ang duha ka mga biktima.

Duna pa silay laing lima ka mga kauban sa inom sa mao nga dapit.

Niabot sa dapit ang usa ka motorsiklo nga dunay sakay nga tulo ka mga tawo.

Ang duha ka mga angkas nanganaog ug nangapyot og PUJ.

Dihang nahaduol na kini sa duha ka mga biktima nanglayat sila sa PUJ dayong pamusil.

Dihang nangaigo na ang mga biktima, nanagan ang mga mamumuno balik sa motorsiklong naghuwat kanila dayong ikyas.

Nasayran sa kapulisan nga posibleng panagbangi sa fraternity ang hinungdan kay niadtong Nobiyembre, dunay gipatay nga sakop sa laing fraternity usab.

Posibleng panimawos ang motibo sa pagpamusil kagahapon, matod sa kapulisan.