HUGTANONG nagpahimagno ang Davao del Sur Provincial Police Office ngadto sa 16 ka mga pulis gikan sa probinsya sa Maguindanao human kini nadestino sa nagkadaiyang munisipyo dinhi sa lalawigan sa pagtarong sa ilang serbisyo.

Kahibaloang dinhi gipangbutang ang 12 ka mga lalaki ug 4 ka babayeng pulis human sila gihulipan sa ilang probinsya nunot sa nahitabong Maguindanao Massacre niatong Nobyembre 23 nga nikalas og 57 ka mga kinabuhi.

Si Davao del Sur provincial police commander Senior Superintendent Ronald Dela Rosa, nagpahimagno sa tanang pulis sa lalawigan nga ayuhon ang ilang pag-serbisyo sa katawhan ug ma-establisar gyud ang tumong nga ‘friendly cop’ ngadto sa publiko.

Gipangkatag na sab ngadto sa nagkadaiyang istasyon sa kapulisan sa lalawigan ang 16 ka mga pulis.

Upat kanila gipadala na didto sa munisipyo sa Sarangani, 4 sa lungsod sa Jose Abad Santos, 3 sa Don Marcelino, 1 sa Bansalan, duha ka policewomen sa Matanao ug 2 ka policewomen sab sa lungsod sa Magsaysay.

Ang mando ni Dela Rosa naglangkob sa pagsul-ob og saktong uniporme ug pag-report sa oras nga gikinahanglan ang ilang trabaho.

“Kailangan talaga na snappy sila mag-uniform at yung prescribe talaga ng PNP,” ni Dela Rosa.

Matod sa DDSPPO nga kinahanglang usa ka ehemplo sa kahapsayg kalinaw ang matag otoridad aron hatagan kini og dakong respeto sa publiko.